السيارات في الشتاء
من النقاط المهمة جداً (جداً) بخصوص السيارات في الشتاء، هي تشغيل المحرك لو كنت راكن في جراج مغمور بالمياه. بسبب دخول مياه أمطار او غيره. أو السواقة في المياه العميقة (اللي تخطت عتب العربية، راجع الصورة المرفقة). خلي بالك إن ده ممكن يكون أخطر شئ تعمله بالنسبة للعربية و خاصة للموتور.
و ده لأن فتحة دخول الهواء للمحرك Air Intake لو في مستوى منخفض.. هيدخل منها مياه للمحرك بدل الهواء و هتؤدي لتلفيات مميتة , أقلها إنحناء أو كسر أذرعة التوصيل Connecting Rods أو بلغة السوق في مصر (البييلات), زي الصورة المرفقة، و ده لأن المياه غير قابلة للإنضغاط جوه الإسطوانات زي الهواء في التشغيل الطبيعي، علشان كده بيحصل كسر أو إنحناء في أذرعة التوصيل (البييلات) بسبب الضغط الهائل اللي بيحصل.
تلفيات تانية؟
إستكمالاً للمعلومة, إن محاولة تشغيل السيارة الغارقة بالمياه, هتؤدي لتلفيات مميتة بالنسبة لسيارتك, و خاصة المكونات الكهربية و الإلكترونية المهمة, زي وحدات تحكم أنظمة السيارة, اللي بيسموها في السوق مجازاً “كمبيوتر العربية” و هي وحدة التحكم في المحرك Engine Control Unit أو ECU, و وحدة التحكم في الفتيس Transmission Control Module أو TCM, و وحدة التحكم في جسم العربية Body Control Module أو BCM و غيرها من المكونات الهامة زي الفيوزات و الوصلات النحاسية “الضفيرة” Harness و الحساسات بأنواعها Sensors.
و كل المكونات دي مش رخصية نهائي, و خصوصاً وحدات التحكم الإلكترونية ECU و TCM و BCM فأسعارهم في الغالب بتكون باهظة.
فلازم تكون عارف عربيتك كويس قبل ما تمشي بيها في المياه أو تشغل موتورها, و ربنا يسلم طريقكم.
ما تنسوش تعملوا شير للتوعية في التوقيت ده مهم جدا..
أتمنى لكم السلامة على الطريق.
لا تنسى عمل مشاركة/شير لنشر المعلومة، ولايك لصفحتنا على فيسبوك #عن_السيارات.
ورجاء الدعاء لوالدتي ووالدي بالرحمة والمغفرة وأن يجعل العمل في ميزان حسناتهم.
أطيب التحايا،
#أبوجادالله_يكتب
#عن_السيارات
لمتابعة نشر المقالات القادمة لي، قم بالإشتراك في النشرة البريدية الأسبوعية لمنصة المقالة من خلال النموذج بالأسفل و بضغطة واحدة:
الكاتب مسئول عن كتاباته على منصة المقالة.
مساحة إعلانية
مهندس و كاتب و مصور فوتوغرافي من مصر، يعمل في مجال صناعة السيارات منذ عقد من الزمان، حاصل على العديد من الجوائز.
