كنت اتكلمت في مقالين قبل كده, واحد عن سبب ظهور لمبة Check Engine في العربيات الحديثة و علاقته بجودة البنزين:
و التاني عن نظافة البنزين و إزاي تختار البنزينة اللي تمون منها:
إستكمالا لموضوع البنزين اللي هو سائل الحياة للعربية, في المقالة دي هكلمكم بأسلوب علمي مبسط عن معلومات أساسية, بالإضافة لأساطير و خرافات موجودة جوه التانك و نصايح اتقالت كتير و للأسف هي مش صحيحة ، و ناس كتير هتتصدم من اللي هقوله، لكن ما باليد حيلة!
خلونا نتفق على شوية حاجات:
طبيعة الشوائب و الأوساخ و مكانها في التانك
في حالة تفويل السيارة ببنزين به شوائب و أوساخ, الأجسام دي أغلبيتها كثافتها أتقل من البنزين فبتترسب في قاع التانك, عظيم!
بالنسبة لوجود مياه في البنزين
المياه برضه هتترسب تحت في التانك!! إزاي الكلام ده؟ هقولك ليه, لأن كثافة البنزين (مادة زيتية خفيفة من مشتقات البترول) أقل من كثافة المياه, فلو جبت كوب مياه و حطيت عليه قطرات بنزين هتطفو على سطح المياه, طيب لو الكوب مليان بنزين و حطيت قطرات مياه؛ المياه هتترسب تحت كأنك رميت مسمار مثلا في مياه لأن المياه كثافتها أعلى.
مكان و شكل مضخة البنزين
طرمبة/مضخة الوقود fuel pump و دي عادة في السيارات الحديثة بتبقى جوه التانك.. و زي الصورة كده هنلاقي الطرمبة نصين و بينهم دراعين كده معدن و بينهم سوستة.. و المكانيزم ده معمول لضمان ثبات الطرمبة على قواعدها على قاع التانك و السوستة تفضل ضاغطة بحيث لو خدت مقطع رأسي في التانك هتلاقي الطرمبة النص اللي فوق.. اللي هو بمثابة غطا التانك و الجزء التاني ثابت على قاع التانك.
طب فين نقطة سحب البنزين في المضخة؟
المفاجأة بقى إن نقطة سحب المضخة من أوطى نقطة في التانك! زي الصورة دي كده (لاحظ السهم الأحمر):
الصورة بتوضح فرق أوطى نقطة في المضخة عن القاع حوالي 2-3 ملم, و ده منطقي علشان تستغل كل سعة التانك.
الله! ده معناه إن لما بحط وقود فيه شوائب أو مياه, أول حاجة بتخش للموتور هي الوساخة كلها؟! هقولك أيوه!
و الأسطورة اللي بتقول بلاش تمشي بالربع الأخير في التانك علشان ما تلمش الوساخة دي أي كلام, البنزين من البداية لازم يبقى نضيف.
طب بالنسبة للشوائب الدقيقة اللي بتعوم في أو على وش البنزين؟
طبعاً ده لا يغني عن الشوائب التانية اللي بتعوم مع البنزين و الأقل في الكثافة دي شغالة معاك على طول و خصوصا مع المطبات و تقليب التانك باستمرار و دي مش ضارة على الفلتر أو الرشاشات و لا حتى الموتور بشكل كبير, بس بتقلل من كفاءة الحرق و بالتالي بتقلل من عزم الموتور و أحياناً تلاقي فيه تفويله تخلص بسرعه و تفويله تطول شوية بنفس العربية و نفس المسافة و نفس ظروف السواقة و ده بسبب النوعية دي من الشوائب.
و الشوائب الأتقل و الأكبر حجماً؟
تأثير الشوائب التانية الأتقل انها بتسد الفلتر و الرشاشات تدريجياً و بالتالي بتحس ان العربية مكتومة و بتحتاج تقرص على دواسة الوقود أكتر.
وجود المياه في البنزين
تأثير جزئيات الماء فحدث ولا حرج أقلها بس إنها ترجرج العربية و الموتور يفوت أشواط الحرق في بعض الاسطوانات. و ده بسبب وجود سبراي مياه و وقود و هواء جوه اسطوانة أو أكتر, و بالتالي النتيجة معروفة وقت الشرارة بتاعة البوجيه, و ده بيخلي العربية تتهز جامد و هي ماشية أو تسمع صوت ترتيل/برجلة من الموتور على idle و انت واقف.
الخلاصة:
يبقى إذاً: استعمل بنزين التانك كله و متخافش بس حاول تستنضف بنزينة كويسة من البداية تحط منها.
عوامة مضخة البنزين
تاني حاجة.. موضوع لما تدخل البنزينة و تقول للعامل فول فيفضل يدي بنزين لغاية ما يطفح العربية, كده حضرتك خسرت مرتين! إزاي؟!
أقولك.. أول حاجة من الفيديو المرفق هتلاقي ده شكل العوامة و المسئولة عن إظهار نسبة الوقود في التابلوه قدامك, العوامة دي بتبقى مش قوية قوي و ليها ريشة كده بتتحرك على تدريج بيترجم الارتفاع بتاع العوامة لاشارة يفهمها الكمبيوتر و يعرض قدامك نسبة الوقود في التانك.
لما تملى التانك للاخر “للزور” فالعوامة بيبقى عليها ضغط كبير و مرة ف التانية هتبوظ منك.
تاني حاجة, مسدس البنزين بيبقى فيه فتحة للراجع بتاخد الأبخرة اللي طالعة.. فلما حضرتك تسيبه يفول للآخر فبالشكل ده فيه شوية بنزين هيرجعوا تاني البنزينة من راجع المسدس و حضرتك هتحاسب عليهم (صحيح مش كتير بس وجب التنويه!)
الخلاصة:
يبقى إذاً: الصح دايما التفويلة على “أول تكة” قول لعامل البنزينة كده و ما تقلقش هيفهم … (أول فصلة للمسدس يعني)
أتمنى لكم السلامة على الطريق.
لا تنسى عمل مشاركة/شير لنشر المعلومة، ولايك لصفحتنا على فيسبوك #عن_السيارات.
ورجاء الدعاء لوالدتي ووالدي بالرحمة والمغفرة وأن يجعل العمل في ميزان حسناتهم.
أطيب التحايا،
#أبوجادالله_يكتب
#عن_السيارات
لمتابعة نشر المقالات القادمة لي، قم بالإشتراك في النشرة البريدية الأسبوعية لمنصة المقالة من خلال النموذج بالأسفل و بضغطة واحدة:
الكاتب مسئول عن كتاباته على منصة المقالة.
مساحة إعلانية
مهندس و كاتب و مصور فوتوغرافي من مصر، يعمل في مجال صناعة السيارات منذ عقد من الزمان، حاصل على العديد من الجوائز.
