ناس كتير تعرف إن علبة البيئة أو Catalytic Converter في منظومة العادم, لو زعلت العربية كلها بتزعل و بتحصل برجلة أو العربية تبقى مكتومة.
لكن إيه هي علبة البيئة دي؟
هي علبة معدنية في مسار العادم (الشكمان) و جواها فحم نشط (خليط من مواد معينة). وظيفته انه يكسر الغازات الضارة اللي طالعة من عادم المحرك زي أول أكسيد الكربون CO و أكاسيد النيتروجين أو نوكس NOX و غيرها. وكلها غازات سامة ممكن تفضي للوفاة إذا تم إستنشاقها لمدة طويلة, و بتسبب ضرر جسدي بالغ لو تم إستنشاقها على جرعات صغيرة بس مستمرة.
بتحصل شوية تفاعلات كيميائية بعد تكسير المركبات دي, و بتكون المركبات الخارجة من العادم ثاني أكسيد الكربون, جزئيات مياه, نيتروجين, و دي عناصر طبيعية و موجودة في الطبيعة و بالتالي وجوده مهم للحفاظ على صحة الناس و البيئة.
إزاي أقدر أحافظ على آدائها؟
من خلال إستخدام محطات بنزين موثوق فيها, و إنك تستخدم درجة الأوكتان المتوصفة لسيارتك, و عدم إستخدام إضافات مجهولة المصدر.
بالإضافة إلى إنك ما تقفش بسيارتك مدد طويلة و المحرك شغال. لأن ده بيسبب تراكم لنسبة من جزيئات الكربون الناتجة من إحتراق الوقود بالمحرك جوه علبة البيئة. مع الوقت بيؤدي لكتم أو بمعنى آخر لسدد جزئي لها و تحس إن الموتور مخنوق و إنك محتاج تزود القوة المطلوبة على دواسة الوقود علشان توصل للسرعة اللي إنت عايزها. ده بيؤدي طبعاً لزيادة معدل إستهلاك الوقود.
إوعى حد يسرقك!
خلي بالك إن محتوى العلبة (الفحم النشط) غالي الثمن. أحياناً بيلجأ بعض الفنيين المتخصصين في تصليح الشكمان من معدومي الضمير بإفراغ المادة غالية الثمن و الضحك على الزبون بدعوى إنها ملهاش لازمة و إنها هتزود أحصنة زيادة للموتور، و ده صحيح انها بتزود أحصنة برقم قليل. بس خلي بالك إن الصانع ضافها للحفاظ على البيئة و عليك و على الناس المحيطين لك.
أحياناً يقولك هغير لك علبة البيئة و ممكن تكون محتاجة غسيل فقط و المادة الفعالة كويسة, علشان ياخد جنيهات زيادة حرام!
إزاي تنضف علبة البيئة؟
فيه عبوات كتير بتتباع في السوق و بتحقنها مع خرطوم سحب الهواء بتاع المحرك. أو إنك تضيفها في تانك البنزين، لكن شخصياً مش برشح النوعية دي من المنتجات. و بفضل طريقة التنضيف الكلاسيكية: إن الفني يفك علبة البيئة و تتغسل بالماء و الصابون فقط!
أتمنى لكم السلامة على الطريق.
لا تنسى عمل مشاركة/شير لنشر المعلومة، ولايك لصفحتنا على فيسبوك #عن_السيارات.
ورجاء الدعاء لوالدتي ووالدي بالرحمة والمغفرة وأن يجعل العمل في ميزان حسناتهم.
أطيب التحايا،
#أبوجادالله_يكتب
#عن_السيارات
لمتابعة نشر المقالات القادمة لي، قم بالإشتراك في النشرة البريدية الأسبوعية لمنصة المقالة من خلال النموذج بالأسفل و بضغطة واحدة:
الكاتب مسئول عن كتاباته على منصة المقالة.
مساحة إعلانية
مهندس و كاتب و مصور فوتوغرافي من مصر، يعمل في مجال صناعة السيارات منذ عقد من الزمان، حاصل على العديد من الجوائز.
