إيه هو الكوبلن ده؟ و وظيفته إيه؟ و إيه اللي يبوظه؟
الكوبلن أو CV Joint / Coupling و ده اﻹسم العلمي بتاعه.. هو الوصلة اللي بتوصل الحركة من الفتيس للعجلات الأمامية (و بيستخدم في سيارات الجر الأمامي فقط أو بعض أنواع الدفع الكلي في العجلات الأمامية برضه) و بيبقوا اتنين لكل عجلة، واحد ناحية الفتيس و التاني ناحية العجلة (داخلي و خارجي).
و بالنسبة للكوبلن الداخلي فهو أطول عمرا بكتير لأنه متثبت و حركته يا أمامية يا خلفية فقط. لو باظ هتبتدي تسمع رزعة في بداية الطلعة أو تعشيق الغيار، وده بسبب تآكل المكونات الداخلية و زيادة الخلوصات.
أما الكوبلن الخارجي و ده الأكثر تلفا مقارنة بالداخلي لأن حركته في كل اﻹتجاهات و إحدى العلامات البارزة لتلفه هيتم إستعراضها بعد قليل.
إيه الأسباب اللي ممكن تبوظ الكوبلن
- عمره اﻹفتراضي جه و ماتغيرش (مصنعين كتير بيقولوا ان عمره اﻹفتراضي بيكون قد العمر اﻹفتراضي للسيارة نفسها ، بس في بعض الدول و خاصة عندنا في مصر العربيات بتطول شوية و أغلبية الناس مش بتغير عربياتها كل 5 سنين زي الأجانب و ده العمر اﻹفتراضي بالنسبة لهم).
- الكاوتشة بتاعته و اللي اسمها العلمي CV Joint Rubber Boot حصل فيها قطع أو شققت و الشحم اللي جوه اتسرب أو دخل تراب ، و ده ممكن نتجنبه عن طريق النصائح اللي قلتها في مقال سابق بخصوص غسيل شاسيه العربية (تقدر تلاقيه من هنا)
- التحميل العنيف عليه في بداية التحرك (انك تبقى جايب آخر عجلة القيادة لليمين أو الشمال و تدوس بنزين فجأة للآخر) ده بيقصف عمر الكوبلن.
- فيه ناس بتقول.. انهم في الملفات بيعملوا الفتيس على مور N علشان الكبالن ما تبوظش و دي من الأساطير المنتشرة و هي غير صحيحة (النقطة اللي فاتت هي اللي تهلك الكوبلن بدري)
إمتى تعرف إن الكوبلن عندك باظ؟!
لما تلف عجلة القيادة للآخر و تبدأ تطلع بالعربية و تسمع صوت طقطقة زي اللي في الفيديو المرفق كده (الفيديو 10 ثواني فقط).
طيب لو سمعت الصوت ده هل ينفع أمشي عليه شوية لغاية ما أفضى و أغيره؟
لأ.. الأأمن ليك و لسيارتك إنك لو سمعت الصوت ده تتوجه فورا للمكان المختص لتغيير الكوبلن التالف.
أتمنى لكم السلامة على الطريق.
لا تنسى عمل مشاركة/شير لنشر المعلومة، ولايك لصفحتنا على فيسبوك #عن_السيارات.
ورجاء الدعاء لوالدتي ووالدي بالرحمة والمغفرة وأن يجعل العمل في ميزان حسناتهم.
أطيب التحايا،
#أبوجادالله_يكتب
#عن_السيارات
لمتابعة نشر المقالات القادمة لي، قم بالإشتراك في النشرة البريدية الأسبوعية لمنصة المقالة من خلال النموذج بالأسفل و بضغطة واحدة:
الكاتب مسئول عن كتاباته على منصة المقالة.
مساحة إعلانية
مهندس و كاتب و مصور فوتوغرافي من مصر، يعمل في مجال صناعة السيارات منذ عقد من الزمان، حاصل على العديد من الجوائز.
