فيه ناس كانت سألتني على موضوع عمرة الموتور -توضيب المحرك- وإزاي أحكم إن العمرة كويسة وأحط زيت إيه بعد العمرة؟
وبناءًا عليه كتبت مقال الأسبوع بتاع النهاردة عن الموضوع ده، وفيه شرح إزاي تحكم على نجاح العمرة من عدمه بطريقة علمية تمامًا وبفضل الله ماحدش اتكلم عليها قبل كده.
بعد ما تخلص عمرة الموتور المفترض انك بتعمل تليين والعربية واقفة كذا يوم وبعدها بتبدأ تتحرك بيها على سرعات منخفضة وRPM قليل.
بعدها بتنزل الزيت المؤقت الخاص بالتليين وتقوم حاطط زيت جديد الميكانيكي بيكون مرشحه ليك علشان تمشي عليه وخلاص كده.
لا.. هنا لنا وقفة!
لازم قبل ما تنزل زيت التليين. إنك تتأكد وتراجع على شغل الخراط والميكانيكي اللي عملت عندهم العمرة. لأن أحيانًا الناس بتشتكي بعد العمرة إنه لقى مشاكل، فعلشان تتأكد من دقة عمل الخراط وتقفيل الميكانيكي للموتور. وبالتالي نجاح العمرة،
لازم تعمل الآتي:
خطوات الحكم على عمرة الموتور أنها ناجحة
- هتروح تقيس (كبس الموتور) الأربع بساتم.
المفترض إني لما بعمل عمرة برجع الموتور تاني كأنه زيرو لأني لغيت الخلوصات الواسعة وبالتالي لازم يكون الكبس محترم، وبالطريقة دي يبقى العمرة نجحت. - النتائج لو طلعت ما بين 9-13 بار يبقى الموتور بحالة ممتازة لو عربية حديثة وبتنصح ببنزين 95، ولو طلعت ما بين 7-9 بار يبقى الموتور كويس للعربيات الأقدم اللي بتنصح ببنزين 90-92. لو أقل من 7 بار يبقى العمرة دي في “الكنافة” [1]سيئة. وهتلاقي الموتور بياكل منك زيت وبنزين. (الكلام ده للعربيات ال injection فقط)
- لو لقيت نتايج الكبس أقل من 7 بار. حط ما مقداره (ملعقة صغيرة) زيت في الفتحة بتاعة البوجية Spark Plug وقيس كبس تاني. لو القرايات اتحسنت بقفزات نوعية. يبقى العيب في العمرة والشنابر Piston rings مش محكمة مع الشميز (السطح الداخلي للإسطوانة) Internal surface of the cylinder نتيجة الخلوصات (عيب خراط)، أما لو القرايات فضلت أقل من 7 بار يبقى العيب في الصمامات (الصبابات) ولازم تراجع عليها لأنها مش محكمة كفاية.
فمهم جدًا وانت بتقيس انك تكون متأكد من إحكام الصمامات لأنها لو بتعمل نسبة تسريب، النتيجة هتكون مضللة. (قبل ما الميكانيكي يقفل وش السلندر لازم تشيك كويس عليهم الأول) لو معرفتش يبقى ارجع للطريقة المكتوبة في النقطة 3 وخلاص. - هتاخد الأربع قرايات بتوع الأربع بساتم وتقارن أعلى ضغط لبستم بأقل ضغط لبستم. لو الفرق يزيد عن 10% يبقى الموتور ده هيبتدي يزعلك بعد شوية كاستهلاك بنزين، واهتزاز للموتور Vibrations، استهلاك في قواعد الموتور. الخ
- من نتايج الكبس تقدر ساعتها تحكم على درجة لزوجة الزيت اللي هتستخدمه هل 10W40 ولا 20W50 يكون أتقل. ولا غيرهم. وهكذا (علشان حرام تكون عامل عمرة كويسة وناجحة كمثال والميكانيكي يكون عايز يأمن نفسه فيوصف لك زيت تقيل وبالتالي انت خسرت تسارع عربية واستهلاك بنزين زيادة، بينما كان ممكن تستخدم زيت أخف وتوفر بنزين وتستمتع بأداء الموتور بعد العمرة).
فلو العمرة كانت ناجحة يبقى ارجع لكتالوج السيارة وشوف الصانع كان بيوصي باستخدام زيت ايه، ولو العمرة كانت مش تمام يبقى استخدم زيت اتقل علشان يساعد في قفل الخلوصات أثناء التشغيل.
معلومة إضافية
ممكن الخطوات الإضافية المذكورة فوق دي بعد قياس الكبس المعتاد، تتعمل على موتور سيارة مستعملة كمان قبل الشراء للحكم على حالة الموتور.
أتمنى لكم السلامة على الطريق.
لا تنسى عمل مشاركة/شير لنشر المعلومة، ولايك لصفحتنا على فيسبوك #عن_السيارات.
ورجاء الدعاء لوالدتي ووالدي بالرحمة والمغفرة وأن يجعل العمل في ميزان حسناتهم.
أطيب التحايا،
#أبوجادالله_يكتب
#عن_السيارات
لمتابعة نشر المقالات القادمة لي، قم بالإشتراك في النشرة البريدية الأسبوعية لمنصة المقالة من خلال النموذج بالأسفل و بضغطة واحدة:
الكاتب مسئول عن كتاباته على منصة المقالة.
مساحة إعلانية
مهندس و كاتب و مصور فوتوغرافي من مصر، يعمل في مجال صناعة السيارات منذ عقد من الزمان، حاصل على العديد من الجوائز.
الملاحظات أو المصادر
| ↑1 | سيئة. |
|---|
عملت عمرة غيرت بساتم شنابر وعملت روديه الوش وجربته مبيسربش وقفلت بتستهلك بنزين زياده عن المعدل الطبيعي ٤ لتر كل ١٠٠ كيلو كبس الموتور ١٠ بار عربية نيوتيجو مانوال موديل ٢٠١٤ تنصحني ياريت تفدني