كلنا نسمع عن /أو نعرف كويس المارش أو Engine Starter و هو موتور كهربي خاص، ملحق بالمحرك و مسئول عن بدء التشغيل.
فكرة عمل بادئ الحركة “المارش”
بعضنا يعرف فكرة عمله البسيطة للغاية : الموتور راكب في نهاية المحور أو Shaft بتاعه ترس، اسمه السوقي ترس البندكس.
أول ما بيتوصل له كهربا (عن طريق آخر لفة للمفتاح في الكونتاكت أو الضغط على زرار بدء تشغيل المحرك Start Engine في بعض السيارات).
بيبقى فيه ملف كهربي جواه عمود معدني اسمه العلمي Solenoid و اسمه السوقي الأتوماتيك.. المجال المغناطيسي اللي بينشأ من الملف بيحرك العمود المعدني و بدوره يجذب ذراع معدني – اسمه السوقي بسكوتة – ف يزق الترس و يعشقه في الحدافة بتاعة الموتور و تحصل عملية بدء التشغيل و اول ما بحرر ايدي من على المفتاح أو بعض العربيات الحديثة لما كمبيوتر العربية يعرف ان الموتور دار، يقوم يفصل الكهرباء عن السولينويد و الترس يرجع لمكانه و المارش يتوقف.
مساحة إعلانية
اللي فات ده كلام علمي عن نظرية عمله، و ممكن مش مهم غير للناس اللي غاوية بس، لكن في الحقيقة فيه شوية حقائق مهمة جدا عن المارش مش منتشرة قوي و مهم جدا لكل مستخدمي السيارات معرفتها ، لتلافي تلف المكون المهم ده و كمان للحفاظ على بطارية سيارتك
نصائح و معلومات هامة
- المارش عبارة عن موتور قوي جدا – عزم جبار لتشغيل المحرك – بيشتغل ب 12 فولت و ده رقم صغير ، لكن بيسحب تيار كهربي في حدود 80-200 أمبير ، حسب الشركة الصانعة و ده علشان يطلع العزم المطلوب.
و علشان أنقل لحضراتكم تصور لقيمة الرقم ده هقول إن أتقل جهاز في البيت بيسحب كهرباء هو الدفاية مثلا لو 3000 واط .. يعني هتسحب حوالي 14 أمبير!! متخيل الرقم دلوقتي عامل إزاي؟ - فلو عملت أي إصلاحات في المحرك أو المارش نفسه و هتعيد توصيل الكابلات بتاعته.. لازم تتأكد كويس جدا (جدا) إن مفيش حاجة مهوية أو سايبة علشان تيار كبير زي ده بيعمل سخونية عالية في الوصلات السايبة و ممكن يؤدي لحريق لا قدر الله.
- موتور العربية لو ما دارش بعد 3 محاولات (خلي مدة المحاولة ما تزيدش عن 10 ثواني بكل حال من الأحوال.. يتبعها توقف 10 ثواني راحة) ما تحاولش رابع أو خامس.. هات حد متخصص يكشف على عربيتك و يعرف ليه الموتور ما دارش أفضل. و ده لأنك لو كملت هتقصف عمر البطارية!
إيه ده؟؟ إزاي؟؟!!
و ده لأن البطارية لو سعتها 55 أمبير.ساعة على سبيل المثال.. و المارش مثلا بيسحب 80 أمبير ف ده معناه إني لو استمريت في المحاولة البطارية شحنتها هتخلص (تنام) ، أو بطريقة علمية ينخفض الجهد للغاية.. و الموضوع ده بيقضي على حياة أي بطارية مع التكرارية مش شرط بطارية العربية بس .. بطارية اللابتوب.. الموبايل.. الخ (علشان كده الشركات بتعمل تحذير 10% و 5% علشان تشحن الموبايل مثلا قبل ما شحنة البطارية تخلص)
ممكن حد يحسبها نظريا و يقولي علشان البطارية تخلص يلزمها حوالي 40 دقيقة، هقولك عمرها ما توصل لربع الرقم ده حتى، و ده يرجع لعوامل كتير.. البطارية وقت التشغيل أصلا مش مشحونة بالكامل.. كفاءة البطارية حتى لو جديدة مش 100% .. كفاءة التوصيلات مش 100% .. الخ - ليه في النقطة اللي فاتت قلت ان المحاولة المفترض ما تزيدش عن 10 ثواني؟
و ده لأن المارش مصمم لتشغيل قصير المدة للغاية.. و قدرته على تحمل التشغيل المستمر : 20 ثانية فقط!
أيوه زي ما قريتها .. لو زودت عن المدة دي الملف اللي جوه هيسخن جدا و العزل يسيح و الملف يتدمر.
مساحة إعلانية
علاقة المارش باستهلاك البنزين!
- طبعا الشركات المغذية المصنعة لبوادئ التشغيل “المارش” شغالة على زيادة كفاءته بحيث إنهم يقللوا سحب التيار الكهربي.. و الحقيقة بيحققوا نتايج كويسة جدا.. وده علشان يقلل إستهلاك الطاقة و بالتالي يوفر في البنزين.. (إزاي؟!)
لما تسحب تيار أقل في بداية التشغيل.. هتشحن البطارية في وقت أقل.. حمل أقل على الدينامو.. حمل أقل على الموتور.. إستهلاك بنزين أقل.
تاني حاجة انهم يطولوا المدة شوية حماية للمارش من التلف .. فيه شركات قدرت توصل ل 30 ثانية و هتلاقيه راكب في بعض العربيات الموجودة دلوقتي بالفعل. - لو في مرة لا قدر الله اضطريت تودي المارش بتاعك علشان تلف الملف بتاعه .. لازم تشوف الاول كان بيسحب كام أمبير (بتبقى مكتوبة عليه أو بتتحسب بسهولة: القدرة ÷ 12) و خلي الكهربائي – و ياريت يكون فاهم و محترف – يقيس بعد عملية اﻹصلاح بقى بيسحب كام أمبير. علشان تتأكد إنه مش شغال و خلاص .. ممكن يكون بقى بيسحب تيار أعلى و يستهلك البطارية أسرع و يبقى حمل دائم على الدينامو أنه يشحن البطارية مدد أكتر .. ده غير زيادة اﻹستهلاك في البنزين.
- لو حاولت في مرة تدور الموتور و ما دارش أو لقيت إن فيه صوت تكة جاي من ناحية الموتور، فغالبا البطارية بتودع أو شحنتها خلصانة (نايمة) .. حاول ساعتها تدور الموتور من خلال وصلة من عربية حد تاني (أو لو مانيوال إديها زقة) علشان تروح تغير البطارية .. أو تديها فرصة تشحن. (طبعا ده في حالة ان العربية في الأساس حالتها كويسة و مش بتعاني من أعطال).
غالبا في الأجواء الباردة و خصوصا في بعض الدول العربية زي مناطق في السعودية”عرعر على سبيل المثال” و الجزائر و غيرهم من الأشقاء، بيكون فيه أجواء ثلجية.. و ده بيقلل شحنة البطارية و كفاءتها كتير، فمهم جدا تبقى البطاريات لها مواصفات خاصة، ان شاء الله هتكلم على البطاريات في مقال خاص بيها لوحده مستقبلا.
أتمنى لكم السلامة على الطريق.
لا تنسى عمل مشاركة/شير لنشر المعلومة، ولايك لصفحتنا على فيسبوك #عن_السيارات.
ورجاء الدعاء لوالدتي ووالدي بالرحمة والمغفرة وأن يجعل العمل في ميزان حسناتهم.
أطيب التحايا،
#أبوجادالله_يكتب
#عن_السيارات
لمتابعة نشر المقالات القادمة لي، قم بالإشتراك في النشرة البريدية الأسبوعية لمنصة المقالة من خلال النموذج بالأسفل و بضغطة واحدة:
الكاتب مسئول عن كتاباته على منصة المقالة.
مساحة إعلانية
مهندس و كاتب و مصور فوتوغرافي من مصر، يعمل في مجال صناعة السيارات منذ عقد من الزمان، حاصل على العديد من الجوائز.
