مربى زيت المواتير! – أسبابها وكل شئ عنها

في مقال السابق تعرضت لموضوع Engine Oil Sludge أو اللي ممكن نسميها مربى زيت المواتير، وناس كتير سألتني عنها وعن أسبابها و غيرها من الأسئلة وقررت أخصص مقالة للموضوع ده.

مربى زيت المواتير engine oil sludge
xsopedia

مربى زيت المواتير: إيه هي المادة دي و بتحصل نتيجة إيه؟

المادة دي عبارة عن مائع غليظ القوام زي الطين أو المربى وبتتكون نتيجة اختلاط الزيت مع الأوساخ والروايش اللي بتحصل جوه الموتور مع التشغيل لمدد زمنية كبيرة بالإضافة لعامل الحرارة الناتجة من تشغيل المحرك فالخليط ده “بيتطبخ” حرفيًا و بتكون النتيجة المربى اللي شايفنها في الصورة المرفقة.

مع الوقت المربى دي فيها جزئيات بتبدأ تتحجر و تتكون تكلسات صلبة.

مربى زيت المواتير: إيه ضرر المادة دي على المحرك؟

ممكن نقسمهم ل 3 مستويات حسب التسلسل الزمني:

  1. زيت المحرك زي ما بيعمل تليين وتزليق للأجزاء الداخلية المتحركة، بيعمل كمان تبريد للمحرك و في أماكن حساسة للغاية و قريبة من مصادر الحرارة العالية. لو الزيت مع الوقت تحول للمربى دي بيكون من الصعب الوصول للأماكن دي وتبريدها وده بيؤدي لنتائج كارثية على الموتور.
  2. لو المادة دي تحول بعضها لكتل صعبة، ده بيؤدي لنحر وتآكل مباشر وسريع في الأجزاء الداخلية. لو كان الموتور نجى من النقطة رقم 1
  3. مع اﻹستمرار في التشغيل المادة دي مش هتساعد الموتور على انها تبقى حتى كشحم، و لكنها هتكون لزجة للغاية في بعضها و متحجرة في البعض اﻵخر وده بيؤدي في فشل تشغيل المحرك Engine Failure أو بلغة السوق وبطريقة أبسط “الموتور هيقفش”
إقرأ أيضاً:  ما هو المارش - كل ما تريد أن تعرف عن بادئ حركة المحرك

طيب إزاي أمنع مربى زيت المواتير من التكون جوه المحرك بتاعي من الأساس؟

اﻹجابة سهلة و بسيطة..

  1. الإلتزام بتغيير الزيت على المسافات اللي أوصى بها صانع السيارة (بتكون مذكورة صراحة في كتاب دليل اﻹستخدام اللي بييجي مع العربية)
  2. الحرص على تغيير فلتر الزيت مع كل غيار زيت، لأن الفلتر بيكون حوش جواه أوساخ وروايش لو كملت عليه مدة زمنية كبيرة المسام بتاعته بتتسد و بعدين نتيجة ضغط طرمبة الزيت القلب بتاع الفلتر وارد ينفجر وكل الشوائب اللي هو حجزها قبل كده هتدخل دفعة واحدة على أجزاء المحرك، فالأفضل إنك تغيره مع كل غيار زيت.
  3. انك تستخدم الزيت من مصدر معتمد لأن فيه مضروب كتير في السوق دلوقتي
    (الأفضل إما البنزينات الكبيرة المعتمدة.. توتال.. موبيل..الخ أو مراكز الخدمة.. أو الموزع المعتمد اللي مذكور صراحة بعنوانه في موقع شركة الزيت اللي عايز تجيب منها)
  4. انك تستخدم ماركة الزيت اللي بيوصى بها صانع السيارة لأن الزيت ده تحديدا بيكون أكتر زيت متوائم مع المحرك بتاعك.
  5. انك تصفي الزيت كله وتحط زيت جديد، لأن فيه أسطورة شائعة بقالها فترة انك تنزل نصف الزيت و تزود نصف جديد.. طبعًا ده أي كلام و بلاش إضافات زيوت المواتير لأن مالهاش لازمة في ظل تطور الزيت التخليقي بالكامل، بل بالعكس ممكن تؤدي لأضرار زي ما شرحت في مقالات سابقة.
  6. انك لو بتستخدم عربيتك علشان تروح بيها البقالة اللي جنبك والمسجد القريب..الخ الأفضل انك تروح مشي (واهه رياضة) و ده لأن تشغيل و إيقاف المحرك كل شوية بدون ما يوصل لحرارة التشغيل الطبيعية ، بيخلي الزيت ما يلحقش يسخن ويتوزع كويس وده بيعمل روايش اكتر.. ودي من مسببات sludge أو المربى اللي قلنا عليها.. ده غير زيادة خلوصات المحرك و تقصير عمره اﻹفتراضي
    لو حاولت تغير الزيت قبل ميعاده هتلاقي في الحالة دي الزيت نازل أسود تماما، نتيجة السبب اللي قلناه.

طيب إزاي تشخص بنفسك إن فيه المربى دي جوه الموتور؟

  1. لو علامة Check Engine بتظهر باستمرار (هي بتنور لأسباب كتير ممكن ده يكون من ضمنها)
    و خاصة لو نورت و نورت معاها لمبة الزيت.
  2. من خلال الفحص الظاهري للموتور (للحالات المتأخرة) هتلاقي بدل ما الموتور بينشع زيت خفيف كده هتلاقيها مربى.
  3. من كارتيرة الزيت oil pan لما تيجي تفتح طبة الزيت هتلاقي المادة اللي نازلة زي أو قريب من الصورة المرفقة فوق.

طيب لو لقيت مربى زيت المواتير دي نازلة من الكارتيرة اعمل ايه؟

أسهل طريقة إنك تستخدم مادة Engine Flush و دي بتتباع في السوق و هات براند معروف و محترم (دي أمثلة – اضغط هنا).

ودي بتستخدم وقت ما خلاص هتغير الزيت.. ولو لقيت اللي بينزل من الكارتيرة سائل.. خلاص كده انت نضفت بنسبة كبيرة، أما لو لقيت تكتلات وان الزيت نازل بصعوبة، يبقى ساعتها الحل الكلاسيكي هو الأفضل، إنك تفك الموتور و يتنضف كل جزء على حدة.

طب إيه أفضل طريقة اعمل بيها Flush؟

انك خلاص تكون ناوي تغير زيت. هتجيب عبوة Engine Flush و تعمل اﻵتي:

  1. لازم تكون جاي من مشوار والموتور سخن وفي درجة حرارة التشغيل الطبيعية (حوالي 90) وده هيساعد كتير لأن الزيت دلوقتي سخن و لزوجته قليلة و بالتالي سهل التخلص منه.
  2. هتصب المادة بتاعة التنضيف في فتحة تزويد زيت الموتور وتشغل الموتور 10-15 دقيقة على الواقف علشان المادة تتوزع وتلف على الموتور كله من جوه وتدوب المربى.
  3. هتوقف الموتور وتفتح طبة الزيت و تسيب الزيت يصفي لمدة 5 دقايق كاملة ولو أكتر خير وبركة (خلي الصنايعي يصبر على العربية)، وده علشان يبقى ضمنت انك تخلصت من معظم الزيت القديم بالمربى بتاعته بمادة الفلاش.
  4. بتغير الفلتر عادي زي المتبع.
  5. بتقفل الطبة وتزود الزيت الجديد.
  6. بتشغل لمدة 5 دقايق وراقب لو فيه نشع أو تسريب علشان تتأكد ان الطبة والفلتر راكبين تمام.

 

إقرأ أيضاً:  أعطال المحرك - كشف لغز الظهور المتكرر لعلامة Check Engine

أتمنى لكم السلامة على الطريق.
لا تنسى عمل مشاركة/شير لنشر المعلومة، ولايك لصفحتنا على فيسبوك #عن_السيارات.
ورجاء الدعاء لوالدتي ووالدي بالرحمة والمغفرة وأن يجعل العمل في ميزان حسناتهم.

أطيب التحايا،
#أبوجادالله_يكتب
#عن_السيارات


لمتابعة نشر المقالات القادمة لي، قم بالإشتراك في النشرة البريدية الأسبوعية لمنصة المقالة من خلال النموذج بالأسفل و بضغطة واحدة:



الكاتب مسئول عن كتاباته على منصة المقالة.

مساحة إعلانية


⇐ لا تنس عمل مشاركة (Share)

المقالة التالية

الأمن والأمان

الأحد مايو 30 , 2021
تمت قراءته: 2٬472 حنتكلم انهاردة عن الأمن والأمان ومعدلات الجرائم طبقًا للتقارير الصادرة من وزارة الداخلية في مصر وازاي نقدر نقدم حلول نساعد بيها رجال الداخلية في تحقيق معدلات الأمن والأمان المطلوبة في مصر. أصدرت وزارة الداخلية تقريرًا مؤخرًا كشف معدلات الجريمة فى مصر خلال عام 2018. وأوضح التقرير المختوم […]
الأمن والأمان

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: رجاء عدم محاولة النسخ، وعمل مشاركة/شير أو استخدم رابط صفحة المقالة كمرجع في موقعك - جميع الحقوق محفوظة لمنصة المقالة