لماذا يقل أداء مكيف السيارة ويعود طبيعي مرة أخرى؟
فيه ناس وغالبًا اللي معاهم عربيات أوروبي بتشتكي من تكييف عربيتها في الصيف إن لما يهدي أو يقف. التكييف يضعف شوية ولما ييجي يتحرك يحس إن الهواء اللي طالع سخن. ويبدأ السعي في طريق التصليح والحلول، ولو عربيته جديدة بيكون مش عارف إن ده ممكن يكون منطقي وطبيعي جدًا!
لماذا يقل أداء مكيف السيارة – السبب الأول
لأن التكييف الكفاءة بتاعته بتزيد طول ما إنت ماشي علشان باستمرار فيه تيار هواء بيخبط في سربنتينة التكييف وبالتالي تكثيف الفريون (المادة المسئولة عن التبريد في التكييف) بيكون أسرع وأكفأ.
لما بتقف بيكون اعتمادك على المروحة وكمية الهواء اللي بتجيبها على السربنتينة مش زي كمية الهواء والعربية ماشية. فعلشان كده تحس إن الكفاءة قلت شوية. (في العربيات اللي بمواصفات خليجي بتكون النقطة دي متظبطة علشان الأجواء الحارة عندهم فالصانع بيكون عامل حسابه).
لماذا يقل أداء مكيف السيارة – السبب الثاني
لما بتيجي تطلع بقى بالعربية. لو انت قارص على دواسة البنزين (في بعض العربيات لو دايس للآخر فقط full throttle) كمبيوتر العربية بيفهم إنك عايز تتحرك بسرعة أكبر في وقت قليل. ف أتوماتيك بيفصل كومبريسور التكييف علشان موتور العربية يقدر يسلم العزم كله والتسارع كله للعجل والعربية تطلع بسرعة وما يبقاش التكييف حمل على الموتور ويقلل التسارع.
وطبعًا الكومبريسور يفصل يعني الهواء هيطلع سخن!
طيب الحل؟ إطلع بعربيتك بطريقة هادية وطبيعية والكومبريسور مش هيفصل (بتبقى مملة لبعض الناس اللي بتحب الجري وخصوصًا لو فيه مطبات الكتير) بس معلش ده حل للموضوع من غير ما تدفع حاجة.
أما بالنسبة للسبب الثالث
هو سبب بسيط جدًا، في الأيام الحر الشديدة، لما التكييف يكون شغال ومسار الهواء مفتوح من خارج السيارة لداخلها.. هتلاقي إن التكييف مطلوب منه طول الوقت يبرد هواء سخن جدًا.
والحل بسيط جدًا، إنك تقفل مسار مرور الهواء بحيث يفضل يلف جوه العربية وبالتالي التكييف هيبرد هواء كان برده قبل كده فيبرد أكتر وبعدها الهواء يعدي عليه تاني فيبرد أكتر … وهكذا.
أتمنى لكم السلامة على الطريق.
لا تنسى عمل مشاركة/شير لنشر المعلومة، ولايك لصفحتنا على فيسبوك #عن_السيارات.
ورجاء الدعاء لوالدتي ووالدي بالرحمة والمغفرة وأن يجعل العمل في ميزان حسناتهم.
أطيب التحايا،
#أبوجادالله_يكتب
#عن_السيارات
لمتابعة نشر المقالات القادمة لي، قم بالإشتراك في النشرة البريدية الأسبوعية لمنصة المقالة من خلال النموذج بالأسفل و بضغطة واحدة:
الكاتب مسئول عن كتاباته على منصة المقالة.
مساحة إعلانية
مهندس و كاتب و مصور فوتوغرافي من مصر، يعمل في مجال صناعة السيارات منذ عقد من الزمان، حاصل على العديد من الجوائز.
