صديق معاه رينو داستر دفع رباعي سألني في رسائل الصفحة عن تغيير زيت الفتيس و زيت المحور الخلفي و حاجات تانية:
“مهندس محمد ….. أحييك على مقالاتك القيمة وأسلوبك الراقى ….. كنت عاوز أستفيد منك فى معلومة مهمه
عندى رينو داستر دفع رباعى وعامل 85 ألف كم.رحت غيرت زيت للكورونه الخلفية الميكانيكى قاللى إن الزيت نازل قليل وفيه رايش
المهم غير الزيت وأخدت لتر زيت كامل.الميكانيكى قاللى إن فيه زيت تانى بيتغير فى الجزء الأمامى فى العربية خاص برضه بالدفع الرباعى ( غير زيت الفتيس ) لكن الميكانيكى مكانش فاضى ساعتها علشان يغيرهولى.
السؤال بقى …. هل موضوع الرايش اللى نزل مع زيت الكورونه ده خطير ؟؟؟
المفروض زيت الكورونه يتغير كل قد إيه ؟
هل فعلا فيه زيت تانى غير الكورونه الخلفيه وزيت الفتيس وزيت الموتور بيتغير للداستر الدفع الرباعى ؟؟
هل فيه حاجه تانية خاصه بالدفع الرباعى بيتعملها صيانة أو تغيير ؟؟؟
شكرا ليك جدا على معلوماتك”
أسطورة زيت المحور الخلفي و زيت الفتيس و أشياء أخرى!
الناس اللي عندها عربيات دفع خلفي RWD أو دفع رباعي 4WD أو بطريقة تانية 4×4 .. بنية آلات الحركة و الدفع عندهم مختلفة شوية عن سيارات الجر الأمامي الأكثر شيوعا في الأيام الحالية.
المقال ده هيركز على تصحيح مفاهيم خاطئة منتشرة عند ملاك و صنايعية و بعض التوكيلات كمان للأسف، فأرجو تخلوا بالكم و خصوصا الملاك حفاظا على مالكم.
1- ميعاد تغيير زيت الفتيس
عادة في كتيب دليل اﻹستخدام (قسم الصيانة) بتلاقي مكتوب كل 80-100 ألف كم و أحيانا هتلاقي مكتوب “فحص حالة الزيت و إضافة زيت لتعويض النقص” الكلام ده اللي الناس بتبص عليه بس.
لكن فيه دايما ملحوظة بتكون مكتوبة عن اﻹستخدام الشاق و بتلاقي ان معدلات التغيير بتكون أقل من كده. و لو قريت إيه هو اﻹستخدام الشاق هتلاقيه هو العادي اللي بيحصل في بلاد زي مصر!
فبيكون مهم جدا (جدا) فحص حالة الزيت قبل ما أضيف زيت و خلاص .. و ده من خلال مراجعة (التغير في اللون – نسبة الروايش – القوام أو بمعنى آخر اللزوجة) التلات حاجات دول هيقولوا ليا الزيت شغال ولا لازم يتغير.
المفترض مراجعة الزيت دي تكون قد إيه؟ في الحقيقة بما إن عربياتنا بتشتغل في ظروف التشغيل القاسية اللي هي (مشاوير قصيرة داخل المدينة – طرق عالية و واطية (مائلة) – طرق مكسرة و غير معبدة ..الخ) ف أنا أنصح إن المراجعة دي تتم كل 50-60 ألف كيلو متر أو 3 سنين (أيهما أقرب).
طيب لو لقيت الزيت مش تمام، يبقى ساعتها بغيره حسب المواصفة اللي الشركة المصنعه قالت عليها و غالبا بيكون 75W-80 في حالة الفتيس المانيوال (كمثال).
فيه حد هيقولي بس أنا أعرف ناس عربياتها عاملة لغاية 100 ألف و أكتر و ماغيرش زيت الفتيس ولا مرة و شغال!
هقولك ده هيكون راجع لحالة التشغيل الطبيعية اللي المصنع قال عليها (مش ظروف تشغيل قاسية) بمعنى معظم مشيه سفر، و ف كل الأحوال أنا مش بقولك غير.. بالعكس أنا أوصي بفحص الزيت الأول قبل ما آخد أي خطوة.
2- هل زيت المحور الخلفي له علاقة بزيت الفتيس؟
المتعارف عليه في عربيات الدفع الخلفي أو الرباعي إن الفتيس لو مانيوال, بيتم تغيير زيت المحور الخلفي / الكورونة / الدفرنش / الدفرنس (حسب كل بلد بتنطقها إزاي) بنفس زيت الفتيس, و الكلام ده صح فقط لو المصنع قال كده, لكن للأسف الموضوع ده مع الوقت اتحول لعرف عند صنايعية كتير و توكيلات انهم يحطوا زيت الكورونة من زيت الفتيس دون الرجوع لتوصية المصنع.
و على سبيل المثال في العربية الرينو داستر 4×4 .. توصية المصنع انه يحط زيت فتيس 75W-80 و يحط زيت كورونة 80W-90 و ده زيت أتقل نسبيا .. طيب إيه اللي بيحصل لو أنا حطيت زيت الفتيس في الكورونة؟
هيشتغل عادي و كل حاجة بس مع الوقت و اﻹستخدام بيحصل تآكل في التروس و بينزل في الزيت على هيئة رايش و بكده الخلوصات clearances بتزيد.
فمع الوقت هتبتدي تسمع صوت “ونة” جاية من ورا و مش هتبقى عارف سببها و ممكن تروح لميكانيكي يقولك ان عمود الكردان مثلا واخد خبطة و هو سبب الونة دي و طبعا ده أي كلام. الزيت الأتقل في الحالة دي بيحمي وبيساعد في قفل الخلوصات و بيمنع حدوث أصوات.
3- طب أغير زيت الكورونة إمتى؟
نفس طلعة الكشف على زيت الفتيس بص على زيت الكورونة .. بمعنى كل 50-60 ألف كيلو أو تلت سنين أيهما أقرب (و مش عايزك تتصدم من اللي هتشوفه!)
4- طيب الكميات بتبقى قد إيه؟
لازم تراجع كتيب الصيانة أو الوكيل و ده حسب إختلاف الموديل و الشركة المصنعة. عادة الفتيس المانيوال بياخد في حدود 2 لتر.
و بالنسبة للكورونة بتبقى عادة من 0.8 – 1.5 لتر أو أكتر حسب الشركة المصنعة برضه (الداستر الرباعي 0.8 لتر علشان الدفرينشيال بتاعها صغير نسبيا) و لو خدت 200 مللي زيادة و كملت لتر مش مشكلة (هتفرق في التكلفة بس).
5- ما هو Transfer Box؟
فيه جزء مهم جداً بيتحط له زيت برضه أغلب الملاك ما بتكونش عارفاه و للأسف أحيانا الصنايعي بيستسهل أو ما بيكونش عارف (لو حد مش متمكن), و هو علبة نقل الحركة و إسمها العلمي Transfer Box.
و الجزء ده بيكون راكب على الفتيس Gear Box أو في شاسيه العربية من تحت بعيد عنه (حسب موديل و تصميم العربية) و الجزء ده وظيفته إنه يوزع الطاقة الحركية اللي طالعة من الفتيس على الأربع عجلات (علشان يبقى الدفع رباعي) و بالتالي هو همزة الوصل بين الفتيس و المحور الخلفي .. و كمان بيكون مسئول عن اختيار تشغيل الجر الأمامي بس أو الدفع الرباعي الكلي من خلال ميكانيزم داخلي.
العلبة دي عادة بتاخد نفس زيت الكورونة و الكمية بتكون من (300 ل 500) مللي لتر بس.. أو بمعنى آخر 0.3 – 0.5 لتر .
و ده بيتعامل نفس معاملة الكورونة بالظبط يعني في نفس طلعة الفتيس.. بص ع الكورونة و الترانسفير بوكس أو علبة تحويل الحركة.
العلبة دي في حالة الرينو داستر بتاخد 300 مللي لتر.
6- مين ممكن يعمل الصيانة دي؟
لازم اللي يشتغل في عربيتك يكون حد أمين و فاهم و سمعته طيبة. و ياريت يكون متخصص فتايس (وخصوصا لو الفتيس عندك أتوماتيك).
7- إيه هو نوع الزيت المناسب؟
هات الزيوت اللي بتنصح بيها الشركة المصنعة ، لأنها بتديلك أعلى آداء و بلاش النوعيات المجهولة أو اللي مش موثوقة (بلاش تسترخص في دي) لأنها ممكن تكلفك تمن فتيس!
على سبيل المثال في رينو بأنواعها مش داستر بس بتنصح بزيت elf .. و ده حسب معلوماتي شركة توتال بتعمله. (فيه صورة جبتهالكم بتوضح درجات اللزوجة بتاعة كل زيت حسب نوع الجير) لكل الرينو.
أتمنى لكم السلامة على الطريق.
لا تنسى عمل مشاركة/شير لنشر المعلومة، ولايك لصفحتنا على فيسبوك #عن_السيارات.
ورجاء الدعاء لوالدتي ووالدي بالرحمة والمغفرة وأن يجعل العمل في ميزان حسناتهم.
أطيب التحايا،
#أبوجادالله_يكتب
#عن_السيارات
لمتابعة نشر المقالات القادمة لي، قم بالإشتراك في النشرة البريدية الأسبوعية لمنصة المقالة من خلال النموذج بالأسفل و بضغطة واحدة:
الكاتب مسئول عن كتاباته على منصة المقالة.
مساحة إعلانية
مهندس و كاتب و مصور فوتوغرافي من مصر، يعمل في مجال صناعة السيارات منذ عقد من الزمان، حاصل على العديد من الجوائز.
شكرا على المقال القيم
شكراً لك