إيه هي “الفوطة الزفرة”, و إيه إستخدامها؟!
بعض الناس بتستخدم آداة سريعة لتلميع سياراتها، وهي “الفوطة الزفرة” و بتكون عبارة عن قطعة من القماش بيتحط عليها جاز (ديزل) و زيت و بتتساب فترة, و بعدها بتستخدم و ميزتها انها بتلم التراب بسرعة و بتدي لمعة جذابة (في البداية).
هل “الفوطة الزفرة” لها أضرار؟
مع الوقت الفوطة الزفرة بتكون لمت تراب كتير بسبب مسح السيارة المتكرر, و التراب ده بيكون إختلط بالزيت و الجاز.
ذرات التراب دي بتعمل صنفرة (خفية في البداية) لطبقة الورنيش و اللي هي وظيفتها انها بتدي لمعة و حماية لدهان السيارة.
فمع الوقت هتلاحظ إن لمعة العربية بتقل، و لو بصيت بمايكروسكوب هتلاقي ان السبب خدوش في طبقة الدهان الخارجية.
تبعيات إستمرار إستخدامها
لو كملت في إستخدام نفس الفوطة مع الوقت هتقدر تميز الخرابيش بالعين المجردة, فنصيحة: بلاش منها.
إيه الحل و البديل “للفوطة الزفرة”
أفضل شئ هو تغطية السيارة عند عدم اﻹستخدام.
مهم جداً كمان إنك تغسل سيارتك بالمياه كل أسبوع مرة أو مرتين حسب الحاجة.
بالإضافة لإستخدام الفوطة الناعمة (مايكروفايبر), لأنها بتكون ناعمة على دهان سيارتك و ما تعملش فيه خدوش.
و احرص على الغسيل الدوري لفوط السيارة المستخدمة, و ده للحفاظ على رونق و جمال سيارتك.
أقدر أشتري الفوط المايكروفايبر منين؟
تقدر تشتريها من أي محل بيبيع مستلزمات و كماليات السيارات, و محطات البنزين, و ممكن تقدر تشتريها أونلاين من مواقع التسوق: (ده مثال من موقع جوميا).
و بالنسبة لتلميع سيارتك, فالأفضل بدل إستخدام الفوطة الزفرة إنك تستخدم الملمعات و شمع التلميع و الموضوع ده إن شاء الله له مقالة منفصلة مستقبلاً.
أتمنى لكم السلامة على الطريق.
لا تنسى عمل مشاركة/شير لنشر المعلومة، ولايك لصفحتنا على فيسبوك #عن_السيارات.
ورجاء الدعاء لوالدتي ووالدي بالرحمة والمغفرة وأن يجعل العمل في ميزان حسناتهم.
أطيب التحايا،
#أبوجادالله_يكتب
#عن_السيارات
لمتابعة نشر المقالات القادمة لي، قم بالإشتراك في النشرة البريدية الأسبوعية لمنصة المقالة من خلال النموذج بالأسفل و بضغطة واحدة:
الكاتب مسئول عن كتاباته على منصة المقالة.
مساحة إعلانية
مهندس و كاتب و مصور فوتوغرافي من مصر، يعمل في مجال صناعة السيارات منذ عقد من الزمان، حاصل على العديد من الجوائز.
