حابب أقول شوية معلومات بما ان موضوع لمبة check engine اللي بتنور ده بقى شائع جداً الفترة الأخيرة و خصوصاً مع العربيات الأوروبي الحديثة, و علاقة الموضوع ده أحياناً بجودة البنزين.
درجة الأوكتان و ارتباطها بجودة البنزين
البنزين ال 92 ممكن ما يكونش 92!, ممكن يكون أقل من كده, و البنزين ال 80 نفس الكلام نتيجة لعدة عوامل, و اللي كشف الموضوع ده الحادثة الشهيرة بتاعة الراجل اللي كان معاه مرسيدس و عطلت منه و الشركة لما فحصت العربية ولقت كل حاجة تمام قاموا حللوا البنزين اللي ف التانك لقوه حوالي 88 مش 92 ولا حاجة, و دي نقطة مالهاش حل ف ايدنا للأسف, حتى المنتجات اللي بتتباع تزود الأوكتان مش هتفيد قوي لأنك مش عارف التفويلة المرة دي الأوكتان بتاعها مظبوط ولا لأ, أنا طبعاً بتكلم علي درجة الاوكتان مش نضافة البنزين (دي لها نقطة لوحدها).
إزاي أحدد درجة الأوكتان المناسبة لسيارتي؟
إفتح الكتالوج أو باب التنك بتاعك هتلاقي إستيكر ملزوق، ممكن ناس كتير ماخدتش بالها منه قبل كده، هتلاقي الشركة المصنعة بتطلب منك تحط بنزين بدرجة أوكتان معينة -مثلاً- مش اقل من 95! و لغاية 98 و في موديلات يقولك حط 92 عادي. و ف الكتالوج هتلاقيه بيقولك خالي من الرصاص.
نظافة البنزين البنزين مرتبطة أيضاً بجودة البنزين
مهم جداً يكون البنزين نضيف و خالي من الأوساخ و الشوائب أو المياه.
و لو هنتكلم على نضافة البنزين نفسه و دي لوحدها مأساة. هنبدأ من التانكر اللي هي العربية الخزان اللي بتبقى جايبه البنزين.
أحيانا ولاد الحلال بيغسلوها بميه لأنها مش طول الوقت بتنقل بنزين بس و بيتبقي شوية ميه تحت – حوالي 50 ل 100 لتر – مش هينزلوا غير لو التانكر وقفت علي رامب او تبه بزاوية ميل معينة علشان تصفى الكلام ده و ده ما بيحصلش.. فالبنزين بالفعل بيبقي جاي معاه مياه!
بالنسبة بقي للبنزينة.. التانكات بتاعة المحطات بتبقى تانكات تحت الارض.. و كل ما كانت المحطة قديمة ما تروحلهاش.. ليه؟! لان المحطات القديمة تانكاتها قديمة و بتتأكل و بيدخل مياه جوفيه ع التانك، ده غير ان الرواسب و الأوساخ بتبقى كتير جدا.. فخليك ف المحطات الجديدة.. و مش كلها برضه.. لان بعض المحطات ليها سمعة مش كويسة.
نصيحة أخيرة بخصوص مضخة البنزين و إضافات البنزين
أهم حاجة لو سمعت صوت زنة جامدة من الطرمبة مع اللمبة اللي منورة، اقف احسن ما تروح خالص.. و ما بنصحش بالاضافات بتاعة النضافة، لأنها بتحل مشكلة فعلا بس بتضر الموتور بعد كده و بتقلل life time بتاعه.
ف لو عملت التدابير الإحترازية دي مش هيحصل معاك حاجة وحشة او على اسوء الفروض هتقل احتماليتها قوي، و ربنا يسلم طريقكم.
المقال القادم بيتكلم عن لمبة check engine بشوية تفاصيل أكثر و علاقتها بجودة البنزين
أتمنى لكم السلامة على الطريق.
لا تنسى عمل مشاركة/شير لنشر المعلومة، ولايك لصفحتنا على فيسبوك #عن_السيارات.
ورجاء الدعاء لوالدتي ووالدي بالرحمة والمغفرة وأن يجعل العمل في ميزان حسناتهم.
أطيب التحايا،
#أبوجادالله_يكتب
#عن_السيارات
لمتابعة نشر المقالات القادمة لي، قم بالإشتراك في النشرة البريدية الأسبوعية لمنصة المقالة من خلال النموذج بالأسفل و بضغطة واحدة:
الكاتب مسئول عن كتاباته على منصة المقالة.
مساحة إعلانية
مهندس و كاتب و مصور فوتوغرافي من مصر، يعمل في مجال صناعة السيارات منذ عقد من الزمان، حاصل على العديد من الجوائز.
