أعطال المحرك – كشف لغز الظهور المتكرر لعلامة Check Engine

إتكلمنا في مقال سابق عن جودة البنزين (تقدر تشوفه من هنا) و إرتباطها بعلامة تحذير الأعطال (أعطال المحرك) Check Engine, في المقال ده هتكلم بتفاصيل أكتر شوية عن لمبة التحذير دي..

إقرأ أيضاً:  جودة البنزين و أهم النصائح للحفاظ على محرك سيارتك

كشف لغز الظهور المتكرر لعلامة أعطال المحرك check engine في السيارات الحديثة و خاصة الأوربي

أول حاجة لازم نعرفها إن العربية زي الطفل لو اشتكت من حاجة هتديك مؤشر لازم تفهمه علشان تقرر تتعامل ازاي و هل الموضوع له أولوية ولا لأ..

علامة أعطال المحرك
Royal Examiner

معنى ظهور علامة Check Engine

على سبيل المثال.. لو ظهرت علامة Check Engine بشكل ثابت.. ده معناه ان المشكلة الموجودة minor حاجة صغيرة.. زي مثلا لو ما ركبتش غطا التانك كويس.. او نسيته مفتوح خالص.. او مشكلة ف حساس الأكسجين.. الخ
لكن لو بتنور و تطفي.. فده معناه ان فيه مشكلة كبيرة، لازم تبطل العربية ف اقرب وقت ممكن و تفحص الموتور لحل المشكلة والا هيحصل تلف في جزء من الأجزاء و يبقى فيه خساير..

هل فيه علاقة بين علامة أعطال المحرك Check Engine و جودة البنزين؟

بالنسبة لظهور العلامة في السيارات الحديثة بكثرة ف ده غالباً بيكون بسبب بنزين سئ اتحط ف عربيتك, راجع المقال السابق لي عن جودة البنزين: أهم النصائح المتعلقة بجودة البنزين للحفاظ على محرك سيارتك.

ايوه.. ليه بقى بيظهر؟ و اشمعنى ماركات تانية مش بتعاني من الموضوع ده رغم انهم بيحطوا نفس البنزين؟!

الأول لازم نعرف إن السيارات الحديثة فيها نظام تحكم متطور و ذكي للغاية Closed Loop بمعنى إني مش بدي أكشن وخلاص.. لأ انا بدي أكشن و عندي حساسات تقولي الاكشن مناسب ولا لأ بشكل مستمر، لضمان أفضل آداء.

و لما الهواء بيدخل حجرة الاحتراق بيترش عليه بنزين و النسبة المثالية 14.7 هواء ل 1 بنزين.

الكمبيوتر ف العربيات الحديثة بيقدر يتحكم ف النسبة دي و يغيرها لضمان أفضل آداء.. بس هو محتاج يعرف نسبة الخليط اللي عملها دي مظبوطة ولا لا.

ف لو نسبة الوقود زادت ف الخليط بيبقى اسمه خليط غني، و لو نسبة الهواء زادت بيبقى اسمه خليط فقير.

فالكمبيوتر محتاج حساس، حد واقف على مكان خروج العادم من المحرك علشان يقوله باستمرار النسبة و الكمبيوتر يدي الاوردر بتظبيطها باستمرار.. الحساس ده اسمه العلمي حساس الأكسجين و اسمه التجاري حساس الشكمان.. و مكانه بعد شجرة الشكمان او exhaust manifold.

exhaust sensor
سنسور الأكسجين أو حساس الشكمان

الحساس ده بيشتغل على درجة حرارة اكتر من 300 مئوية و ده بيفسر ليه لما بتدور الموتور الصبح ف السقعة تحس الموتور متبرجل.. و ال RPM عمال يطلع و ينزل لأن الكمبيوتر مستني الاشارة من اخينا ده و هو لسه ماشتغلش او الاشارة مانتظمتش، ف الكمبيوتر بيضرب نسب.. لغاية ما درجة الحرارة تظبط و السينسور يشتغل، ساعتها تسمع صوت الموتور بقي ناعم.. او كتدبير احترازي هو متبرمج عليه ف حالة عدم وصول إشارة انه بيزود نسبة البنزين و ده بيفسر ليه RPM بعد كذا دقيقة بعد بدء التشغيل بينزل من 1000 ل 800 وتلاقي الموتور هدي وصوته نعم.

معلومة ع الماشي!

ف العربيات الألماني زي مرسيدس و BMW الموديلات الحديثة بيبقوا عاملين السينسور ده فيه سخان علشان يوصل لدرجة حرارة التشغيل بسرعة جداً! و بالتالي بتاخد احسن آداء من المحرك من اول نص دقيقة!

إقرأ أيضاً:  أساطير و خرافات بداخل تانك البنزين!!: تفنيدها و إظهار الحقيقة

طيب إيه اللي بيحصل مع بنزين جودته سيئة؟

مجرد ما بتحط بنزين سئ في سيارتك.. بيحصل ايه؟ الكمبيوتر خد اشارة ف امان الله و راح قايل للرشاشات النسبة كذا.. و لنفترض ان البنزين فيه جزيئات ميه بسيطة.. لما الخليط ده يطلع للسينسور هيشوفه خليط فقير رغم ان الرشاشات بعتت الكمية المطلوبة بالظبط .. ف الكمبيوتر يقوم يزود البنزين و هكذا.. و احيانا بسبب البرجلة الاشارة بتيجي مش منطقية للكمبيوتر فيروح ضاربلك لمبة Check Engine و مسجل كود ايرور لأنه عجز عن فهم اللي بيحصل.. او الإشارة اللي بتجيله وقفت خالص
و ده ليه اللمبة بتنور.

ايه الآثار المترتبة على كده؟

  1. لو افترضنا السيناريو اللي طرحته فوق ده.. و ده الأكثر شيوعاً.. زيادة نسبة البنزين ف الخليط معناها استهلاك زيادة معناها فلوس بنزين زيادة.. و دي بتعرفها ببساطة انك بتقف ورا العربية و تبص ع الشكمان. لقيت دخان اسود خارج و هباب كتير علي فتحة الشكمان يبقي عندك نسبة بنزين عالية ف الخليط.
  2. لو العكس بتلاقي العربية تقيلة معاك و عزمها ضعيف و علشان توصل للسرعة اللي انت عايزها بتفعص دواسة البنزين لأن الخليط فقير.

ايه الحل لما علامة أعطال المحرك تنور؟

حاجة من اتنين:

  1. الأولى انك تروح لأي حد معاه جهاز كشف عن الأعطال سواء ف ورشة او التوكيل و يمسح كود الايرور ده اللمبة بتطفي.
  2. أو.. تفصل كابل السالب بتاع البطارية لمدة ما تقلش عن نص ساعة علشان كمبيوتر العربية يتعمل له ريستارت.. و بتوصل تاني.

ده علشان تطفي العلامة, تعمل ايه علشان ما تنورش بقى؟!

أول حاجة: سيبك من العبوات اللي بتتباع دي و بتحطها ع البنزين لأنها مجرد مسكن و ضررها أكتر من نفعها. و كده كده البنزين سئ (مش نظيف) و هي مش هتعمل معجزة و تنضفه.

الصح إنك تفك سينسور الأكسجين و تنضفه. بورقة صنفرة ناعمة نسبيا P120 و اسبراي خاص بالإلكترونيات.. لأنك هتلاقي الكربون مترسب عليه و مانعه من العمل بشكل صحيح و بعدها تركبه تاني أو غيره لو مفيش منه أمل.

before and after
الفرق بين قبل و بعد

الحاجة التانية: مهم جداً (جداً) إنك تنتقي محطات البنزين بعناية و ماتحطش من أي بنزينة و خلاص، و راجع البوست السابق عن جودة البنزين في مصر و ازاي هتختار محطة الوقود.. علشان يفضل حساس الأكسجين شغال لاطول فترة ممكنة و ما تحتاجش تعمل عملية النضافة دي كل شوية.

إقرأ أيضاً:  أسباب زيادة استهلاك البنزين - تعرف على أهم 10 أسباب

أتمنى لكم السلامة على الطريق.
لا تنسى عمل مشاركة/شير لنشر المعلومة، ولايك لصفحتنا على فيسبوك #عن_السيارات.
ورجاء الدعاء لوالدتي ووالدي بالرحمة والمغفرة وأن يجعل العمل في ميزان حسناتهم.

أطيب التحايا،
#أبوجادالله_يكتب
#عن_السيارات


لمتابعة نشر المقالات القادمة لي، قم بالإشتراك في النشرة البريدية الأسبوعية لمنصة المقالة من خلال النموذج بالأسفل و بضغطة واحدة:



الكاتب مسئول عن كتاباته على منصة المقالة.

مساحة إعلانية


⇐ لا تنس عمل مشاركة (Share)

المقالة التالية

نيسان ليف LEAF تستطيع قيادتها بدواسة واحدة فقط! - E-Pedal

الأحد فبراير 28 , 2021
تمت قراءته: 3٬661 زي ما ناس كتير عارفة إن شركات السيارات الكبرى في سباق تكنولوجي مستمر و المنافسة بتكون شرسة جداً و على أشدها, إلا إن من أكتر الشركات اللي بتبهرني الحقيقة بإبتكارات تكنولوجية ثورية جديدة وبتقفز قفزات واسعة جداً شركات زي مرسيدس و جنرال موتورز و BMW و مجموعة […]
nissan leaf e-pedal

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: رجاء عدم محاولة النسخ، وعمل مشاركة/شير أو استخدم رابط صفحة المقالة كمرجع في موقعك - جميع الحقوق محفوظة لمنصة المقالة