زي ما ناس كتير عارفة إن شركات السيارات الكبرى في سباق تكنولوجي مستمر و المنافسة بتكون شرسة جداً و على أشدها, إلا إن من أكتر الشركات اللي بتبهرني الحقيقة بإبتكارات تكنولوجية ثورية جديدة وبتقفز قفزات واسعة جداً شركات زي مرسيدس و جنرال موتورز و BMW و مجموعة VW وغيرهم.. و في السنين الأخيرة شركة نيسان بقت بتعمل طفرات تكنولوجية غير مسبوقة و خارج الصندوق زي موضوع النهاردة بخصوص السيارة نيسان ليف Nissan Leaf.
نيسان ليف, سيارة تستطيع قيادتها بدواسة واحدة فقط!
شركة نيسان أعلنت في (27/2/2018) عن طرح سيارة خلاص تقدر تسوقها ببدال/دواسة واحدة! و أطلقوا على البدال/الدواسة دي اسم:
البدال / الدواسة الإلكترونية / E-Pedal
التكنولوجي الجديدة دي جزء من رؤيتهم و خطتهم لنظام اسمه “Nissan Intelligent Mobility” يعرف إختصارًا NIM و معناه “تنقل نيسان الذكي”.
NIM هتكون مستخدمة في الجيل الجديد من سيارتها الكهربائية نيسان Leaf.
طب إيه هي الدواسة الإلكترونية, و إزاي أسوق عربية زي “نيسان ليف” بدواسة واحدة بس؟
الدواسة مكان دواسة البنزين العادية, و فكرة عملها بسيطة للغاية:
- لتشغيل السيارة؛ هتدوس على الدواسة و تدوس على زر التشغيل.
- التحرك و التسارع هتدوس على الدواسة زي السيارة الأتوماتيك عادي.
- عند تهدئة السرعة تخفيف ضغط القدم من على الدواسة.
- الفرملة / الوقوف على سطح منحدر فور إزالة القدم من على الدواسة العربية هتفرمل و تقف تماماً!
طبعاً دواسة الفرامل الميكانيكية المعتادة موجودة علشان لو لا قدر الله فيه موقف مفاجئ تقدر تفرمل بأمان كطوارئ, و بمساعدة أنظمة الأمان المساعدة زي ABS و غيرها.
هل دي ميزة؟
الميزة في التكنولوجي دي إنك تقدر تسوق باستخدام دواسة واحدة
راحة أكتر في السواقة عن طريق تقليل الإجهاد على القدم لأنك تقدر تعمل كل الخطوات السابقة دي بقدم واحدة، و لو انت ماشي في طريق زحمة و ما أكترها -على سبيل المثال- في قاهرة المعز العتيدة: (دوس برجلك تمشي، ارفع رجلك تقف) وهكذا.. بالبساطة دي!
الفكرة فعلاً برّه الصندوق و كانت أول مرة تطبق في سيارات الركاب.
أتمنى لكم السلامة على الطريق.
لا تنسى عمل مشاركة/شير لنشر المعلومة، ولايك لصفحتنا على فيسبوك #عن_السيارات.
ورجاء الدعاء لوالدتي ووالدي بالرحمة والمغفرة وأن يجعل العمل في ميزان حسناتهم.
أطيب التحايا،
#أبوجادالله_يكتب
#عن_السيارات
لمتابعة نشر المقالات القادمة لي، قم بالإشتراك في النشرة البريدية الأسبوعية لمنصة المقالة من خلال النموذج بالأسفل و بضغطة واحدة:
الكاتب مسئول عن كتاباته على منصة المقالة.
مساحة إعلانية
مهندس و كاتب و مصور فوتوغرافي من مصر، يعمل في مجال صناعة السيارات منذ عقد من الزمان، حاصل على العديد من الجوائز.
