الوسائد الهوائية (اﻹيرباج): لماذا لم تنطلق في الحادث؟!

شفنا من كام يوم بوست منتشر على فيسبوك لواحد كان سايق عربيته وعمل حادثة واشتكى ان الوسائد الهوائية -Airbags أو الاسم الشائع “اﻹيرباج”- مافتحتش و ده أدى لإصابات بدنية جسيمة عنده (شافاه الله و عافاه من كل سوء).

أنا مش عارف ايه السيناريو اللي حصل بالظبط معاه بس حبيت أوضح (كمتخصص في مجال صناعة السيارات) ممكن ليه الوسائد الهوائية ما تفتحش؟ بالإضافة لشوية معلومات مهمة عن منظومة الوسائد الهوائية / اﻹيرباج لازم الناس تعرفها علشان تحافظ على حياتها (من باب الأخد بالأسباب طبعا).

الوسائد الهوائية
腾讯
إقرأ أيضاً:  مطب مفاجئ! - ماذا تفعل إذا اكتشفت عائق على الطريق و انت مسرع؟

ليه اﻹيرباج / الوسائد الهوائية ما تفتحش في الحادثة؟

الحقيقة إنه فيه أسباب كتير ممكن تعمل كده، منها تلف في إحدى مكونات المنظومة بسبب بعض العوامل أو عيب صناعة و دول مش هخوض فيهم لأنهم عهدة على الشركة المصنعة ذاتها، لكن فيه أسباب تانية مهمة لازم مستخدمي السيارات تعرفها..

منظومة الوسائد الهوائية SRS و SRP

فيه نوعين من منظومة اﻹيرباج SRS و SRP و بتلاقي الحروف دي مكتوبة في أماكن الوسائد الهوائية Airbags في عربيتك.

الفرق ان واحد منهم (اللي هو SRS = supplimental restraint system) الإيرباج بتفتح في كل الأحوال بنفس الطريقة.

و دي هيئات السلامة العالمية لقت انها حاجة في منتهى الخطورة لأن وقت الحادث لو السائق مش رابط حزام الأمان صدره هيندفع لقدام بشدة و اﻹيرباج بتفتح لحظيا في زمن (30-55 ملي ثانية = 0.03 – 0.055 ثانية) أقل من زمن رمشة العين!، و بتفتح بقوة إنفجارية بسبب دخول غاز النيتروجين المفاجئ اﻹيرباج و ده بيؤدي ﻹجبار الرأس اﻹندفاع للخلف فجأة. تخيل واحد صدره بيتجه لقدام و دماغه بتتزق للخلف فجأه.. طبعًا النتيجة معروفة!

بالإضافة لمستوى ارتفاع حزام الأمان لكتف الراكب ووضع السيارة بالنسبة للمستوى الأفقى ومعطيات تانية، نظام SRS مش بيتعامل معاها.

فكانت النتيجة الحتمية هي SRP أو seat reference point. or seat reference plane و هو نظام أكثر تطورًا وبيكون فيه حساسات أكتر وكمبيوتر يقدر يفهم وقت الحادث الركاب رابطين حزام الأمان ولا لأ حاجات تانية كتير، وبناء عليه بيفتح الإيرباج حسب ما يناسب الموقف سواء رابطنيه ولا لأ.

في كل الأحوال طبعا الحزام مهم جدا علشان تاخد بالأسباب.. ممكن واحد يفضل يسوق طول عمره كويس بس في النهاية الحادث بيحصل في لحظة و ممكن مايكونش غلط منك و يكون الخطأ من سائق آخر. (الموضوع لا يقاس بالشطارة نهائي).

إقرأ أيضاً:  حزام الأمان - سبب أهميته و أخطاء شائعة عند إرتداؤه تبعياتها بالغة الخطورة!

حساس اﻹيرباج أو Crash Sensor

وهو عنصر في منظومة اﻹيرباج في منتهى الأهمية و هو حساس اﻹيرباج أو Crash Sensor .. و ده يبقى جزء صغير كده حسب الصور الموضحة تحت و ده اللي بيقول لمنظومة اﻹيرباج و كمبيوتر العربية ان فيه حادثة حصلت حالًا، و مكانه دايمًا في مقدمة السيارة خلف اﻹكصدام مباشرة.

مكان الكراش سينسور
M. AboGadAllah

و ممكن بعض الشركات تزود العدد لمزيد من الأمان فبتحط قدام 2 أو 3 وبيتحطوا في الأماكن المحتملة للصدمة. و لو العربية فيها إيرباج جانبي فالبتبعية بيحطوا سينسور في جانب أو باب السيارة من الأسفل. ده غير إن بعض الشركات بتضيف سينسور جوه كابينة القيادة علشان تقارن قرايات الحساسات ببعض. و طبعا أفضل السيارات أمانًا في النقطة دي السيارات الفولفو بلا منازع يليها مرسيدس و BMW و أودي..الخ.

أماكن حساسات الوسائد الهوائية
AutoShop

إستكمالا للمعلومة، السينسور ده فيه منه مدرستين.. ميكانيكية أو اليكترونية:


مساحة إعلانية


1- النوع الميكانيكي

فكرته بسيطة جدا (زي الصورة المرفقة / رسمتها باستعجال فمحدش يضحك)

رسم توضيحي للكراش سينسور
M. AboGadAllah

أنبوب صغير جواه بلية منجذبة دايمًا لطرف بفضل مغناطيس موجود، و الناحية التانية نقط تلامس .. وقت الحادثة بيحصل وقوف مفاجئ فبتتحرر البلية من جذب المغناطيس و تنطلق للناحية التانية من الأنبوب و بيحصل تلامس و اﻹيرباج تفتح.

كراش سينسور - حساس الوسائد الهوائية
ebay

طب مانا أحيانا بتعرض لمواقف على الطريق ممكن أقف فجأة ليه اﻹيرباج ما بيفتحش؟!

أقولك لأن وقوف مفاجئ دي توصيف مش دقيق قوي للفرملة المفاجئة!

الصح انك تقول فرملة مفاجئة و العربية بتقف بعد مسافة معينة في كل الأحوال (وليكن 20 متر من الضغط على دواسة الفرامل). لكن الوقوف المفاجئ ان واحد مثلًا لا قدر الله يصطدم بشجرة (مسافة التوقف صفر متر).

و عادة السينسور بيبقى مصمم انه يدي اﻹشارة عند اﻹصطدام بحائط على سرعة من 19-25 كم/ساعة .. أو على سرعة تقارب 40 كم/ساعة لو اصطدم بسيارة تانية. والفعلي يبقى عادة أقل أو أزيد شوية حسب سيناريو و تفاصيل الحادث.

2- النوع الإلكتروني Solid State

و بيبقى شريحة اليكترونية Piezoelectric Crystal والمادة دي بتقدر تقيس حاجات كتير مفيدة منها معدل إنخفاض السرعة المفاجئ و الضغط (زي اللي في الصورة)، واﻹتجاه دلوقتي في الصناعة للنوعية دي علشان الموثوقية واﻹعتمادية بتاعتها أعلى.

كراش سينسور الكتروني
M. AboGadAllah

طيب كده ممكن حد يلمح حاجه.. إن ممكن يحصل حادث و العربية يبقى فيها سينسور واحد والخبطة تبقى بعيد عنه أو إن العربية تخبط في عائق بزاوية وتتقلب أو تغير اتجاهها وتفضل تزحف وبالطريقة دي السينسور مش هيحس بحاجة وبالتالي اﻹيرباج مش هيفتح ودي بتبقى حالات نادرة شوية.

ملحوظة هامة: طبعًا كل ما منظومة الأمان في العربية بقت أحسن و أقوى هيقابله سعر أكتر، فنصيحة للأصدقاء المقدمين على الشراء ، ما تختارش الكماليات على حساب منظومة الأمان.

فيه معلومة طيبة إن في السنوات الأخيرة مصنعين السيارات اتجهوا لوضع صندوق أسود في العربية نفس فكرة الطيارات كده، و مكانه غالبا بيبقى في وحدة اﻹيرباج نفسها. و بتبقى شريحة بتسجل شوية معلومات مهمة لا يمكن مسحها. زي توقيت الحادثة و السرعة وقت الحادثة وحالة الفرامل وبيان بقرايات الحساسات كلها ومكان الحادث لو العربية مزودة بنظام ملاحي GPS وده بيفيد اللجنة الفنية وقت فحص العربية للمساعدة في معرفة اللي حصل. بس مش كل الشركات طبقتها لسه.

 

إقرأ أيضاً:  تيل الفرامل / الفحمات / Braking pads - علامات وجوب التغيير (هام جدًا)

أتمنى لكم السلامة على الطريق.
لا تنسى عمل مشاركة/شير لنشر المعلومة، ولايك لصفحتنا على فيسبوك #عن_السيارات.
ورجاء الدعاء لوالدتي ووالدي بالرحمة والمغفرة وأن يجعل العمل في ميزان حسناتهم.

أطيب التحايا،
#أبوجادالله_يكتب
#عن_السيارات


لمتابعة نشر المقالات القادمة لي، قم بالإشتراك في النشرة البريدية الأسبوعية لمنصة المقالة من خلال النموذج بالأسفل و بضغطة واحدة:



الكاتب مسئول عن كتاباته على منصة المقالة.

مساحة إعلانية


⇐ لا تنس عمل مشاركة (Share)

المقالة التالية

السفر في الفضاء عن طريق طي النسيج الزمكاني

الخميس أبريل 22 , 2021
تمت قراءته: 6٬492 العالم من حولنا وخصوصا وكالة الفضاء الأمريكية “ناسا” بتدرس طريقة جديدة للسفر في الفضاء. مشكلة السفر في الفضاء هي ان المسافات شاسعة وكبيرة جدًا، يعني لو افترضنا ان أقرب كوكب شبيه بكوكب الأرض بيقع على مسافة 200 سنة ضوئية (ودي بالمناسبة مسافة صغيرة جدًا جدًا) فده معناه […]
السفر في الفضاء

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: رجاء عدم محاولة النسخ، وعمل مشاركة/شير أو استخدم رابط صفحة المقالة كمرجع في موقعك - جميع الحقوق محفوظة لمنصة المقالة