معلومة مهمة قد تغيب عن ناس كتير و هي بخصوص تيل الفرامل أو الفحمات أو Braking pads. و هي علامة بيصدرها التيل علشان ينبهك إنه قرب يخلص و انك نسيت تغيره!
دور تيل الفرامل / الفحمات
لما بدوس على دواسة الفرامل بيتحرك التيل الخارجي و الداخلي و بيضغطوا على الإسطوانة من الناحيتين علشان يوقفوا العربية. مع الإستخدام الجزء الإحتكاكي في التيل بيتآكل و بيكون مهم اني أغير التيل ده لما يخلص (بيكون فاضل فيه حوالي ٤ ملم أو أقل)
طيب أعرف منين انه خلاص وجب تغيير التيل / الفحمات؟
و للإجابة على السؤال ده لازم نعرف إن صناع السيارات بيضيفوا آداة للتيل تعرّف مالك السيارة امتى لازم يغير. و الآداة دي إما ميكانيكية و دي الأكثر شيوعاً، أو إلكترونية و دي بتكون في العربيات الحديثة و خاصة في الفئة الفخمة منها.
1- النوع الميكانيكي
النوع الأكثر شيوعاً و هو النوع الميكانيكي و بيتم فيه إستخدام ريشة معدنية كده بأبعاد محددة.
هتلاحظ التيل الأحمر اللي على اليمين لسه جديد و الجزء الإحتكاكي فيه لسه كبير، مع الإستخدام تخانة الجزء الإحتكاكي ده بتقل لغاية ما طرف الريشة المعدنية دي (اللي عليها السهم) يبدأ يحك في إسطوانة الفرامل (الطنبورة) و يعمل صوت صفير/احتكاك معدني مع كل مرة هتستخدم فيها الفرامل و بكده تعرف إن التيل خلاص وجب تغييره.
أسباب أخرى لصفير التيل / الفحمات
أحياناً بيكون فيه أسباب تانية للصفارة مع استخدام الفرامل، زي مثلاً وجود حبيبات رمل أو وسخ لازقة على سطح التيل و دي بتروح مع فك التيل و صنفرته و تنضيفه.
أو إن خامة التيل نفسها سيئة و فيها نسبة برادة معدنية زيادة و الحل ساعتها بتغيير التيل بآخر جودته أحسن و ده حفاظاً كمان على الطنابير.
2- النوع الإلكتروني
بالنسبة للنوع التاني اللي هو الإلكتروني بيكون فيه حساس في التيل ، لما التيل خلاص بيجب تغييره ساعتها بيبعت إشارة لكمبيوتر العربية فتظهر لك علامة تنبيهية قدامك.
تبعيات تجاهل تغيير تيل الفرامل / الفحمات
و في كل الحالات من المهم جداً إنك ما تتجاهلش صوت الصفارة أو العلامة على التابلوه. لأن لو إستخدت تيل خلصان بيكون فيه خطورة على حياتك لانخفاض كفاءة الفرامل و كمان لتلف اسطوانات/طنابير الفرامل. و دي تمنها بيكون ٣ أو ٤ أضعاف تمن التيل.
من المهم إنك تبقى عارف إن متوسط إستهلاك التيل ٢٠ ألف كم حتى ٤٠ ألف كم حسب طريقة إستخدامك للفرامل و حسب مدى جودة التيل.
و دي حاجه مهم إنك تكون متابعها لأنها مرتبطة إرتباط مباشر بسلامتك الشخصية.
في النهاية أتمنى لكم السلامة من كل سوء.
أتمنى لكم السلامة على الطريق.
لا تنسى عمل مشاركة/شير لنشر المعلومة، ولايك لصفحتنا على فيسبوك #عن_السيارات.
ورجاء الدعاء لوالدتي ووالدي بالرحمة والمغفرة وأن يجعل العمل في ميزان حسناتهم.
أطيب التحايا،
#أبوجادالله_يكتب
#عن_السيارات
لمتابعة نشر المقالات القادمة لي، قم بالإشتراك في النشرة البريدية الأسبوعية لمنصة المقالة من خلال النموذج بالأسفل و بضغطة واحدة:
الكاتب مسئول عن كتاباته على منصة المقالة.
مساحة إعلانية
مهندس و كاتب و مصور فوتوغرافي من مصر، يعمل في مجال صناعة السيارات منذ عقد من الزمان، حاصل على العديد من الجوائز.
بالتوفيق صديقي الغالي
أعزكم الله يا صديقي و أسعدك