غسيل شاسيه السيارة و تشحيمه – ما هي الطريقة الصحيحة و الأخطاء الشائعة؟

فيه موضوع مهم كتير مننا إما بيغفل عنه للأسف أو بيكسل يعمله، و لقيت إن مهم إني أتكلم عنه و هو “غسيل شاسيه السيارة”.

غالباً ملاك السيارات بيهتموا بغسيل السيارة من الخارج على فترات دورية منتظمة، و نسبة أقل شوية بتهتم بغسيل السيارة من الداخل كمان على فترات منتظمة، و يمكن ده بيرجع لأن -العربية من بره و جوه- قدام عنينا طول الوقت.

لكن فيه جزء مهم جداً إحنا مش شايفينه في جسم العربية و نضافته الدورية أهم بكتير من -غسيل بره و جوه, اللي احنا متعودين نعمله! -و هو شاسيه العربية من أسفل و ده لأن الشاسيه راكب فيه ميكانيزمات مهمة جداً زي نظام التوجيه و التعليق و غيرهم.. و ممكن الموضوع يصل إن واحد يتعطل على الطريق بسبب إهماله في نضافه شاسيه العربية أو تنضيفه بطريقة غلط لمدد طويلة.

في المقال ده هتكلم عن نصائح مهمة تقدر تحافظ بيها على شاسيه سيارتك و الأنظمة اللي راكبة عليه لأطول فترة ممكنة.

غسيل شاسيه السيارة
Howarth Bros

غسيل شاسيه السيارة

  • أول نقطة (اللي هي: بسم الله الرحمن الرحيم).. حوالي 80% من مغاسل السيارات.. بتغسل الشاسيه غلط!! سواء باستخدام مواد غير مناسبة أو الآداة أو الطريقة نفسها.. طب إزاي؟؟!!
  • معظم المغاسل بتغسل الشاسيه بديزل / جاز / سولار (لأنه بيفك الأوساخ المتراكمة بسرعة و بيخلي الشاسيه شكله حلو و بيلمع) بس للأسف الجاز ده -حتى لو نفضت / جففت العربية بالهواء- بيتبقى منه أجزاء بسيطة على القطع المطاط/الكاوتش و مع الوقت بيتفاعل معاها و بيحصل تشققات و تبتدي التشققات تزيد بعد فترة و يخرج الشحم و يتلف الجزء في النهاية.. و أبسط مثال على الموضوع ده كاوتشات الكبالن CV Rubber (زي الصورة المرفقة).. اللي خروج الشحم منها و دخول الأتربة و الأوساخ بيؤدي لتلف الكوبلن في النهاية. ده غير سيور الموتور اللي “بينوبها من الحب جانب”.
إقرأ أيضاً:  الكوبلن وعلامة هامة تحذرك من تلفه و وجوب التغيير "لا تغفلها!"
غطاء - كاوتشة الكوبلن
AutoMechanic

الطريقة الصحيحة لغسيل شاسيه السيارة

  1. لازم تكون العربية باردة نسبياً .. مش جاية يعني من مشوار طويل.. لو العربية اتغسلت بعد مشوار طويل ..غلط جداً لأن ف الحالة دي المياه هتيجي على أجزاء معدنية سخنة جدا زي الطنابير بتاعة الفرامل كمثال و تتبرد فجأة و ممكن تعمل تشوهات و تبتدي تحس برجرجة Brake Juddering في الفرامل بعد كده أو تسمع أصوات مش ظريفة لما تيجي تفرمل.
  2. العربية دلوقتي مرفوعة و متثبتة كويسة.
  3. البدء بالغسيل بمسدس/باشبوري المياه كويس جداً – حوالي 3-4 دقايق – (و الحرص على إزالة الأتربة و الأوساخ عن كل القطع الكاوتش كمان لأن الأتربة و الرمال العالقة و الكلام ده كله بيبقى فيه أملاح و بتاكل في الكاوتش برضه.
  4. إستخدام مسدس الفوم/الصابون و تغطية الشاسيه بطبقة فوم و تنضيف الشاسيه بقطعة قماش سريعاً كده للمناطق الشديدة الإتساخ فقط (اللي لازقة) , حوالي دقيقة ، علشان الفوم مش هيطول.
  5. غسيل بمياه مرة تانية لإزالة آثار المنظف -حوالي 1-2 دقيقة-.
  6. تجفيف الشاسيه من خلال مسدس هواء -2-3 دقيقة-.
  7. عمل تشحيم للمفصلات و الأجزاء المتحركة. – 3-4 دقيقة – (الموديلات الحديثة مش بتحتاج الموضوع ده و لكن ممكن تشحم المفاصل المتحركة بس زيادة في الحماية لو بتتعرض لطين أو رمال في طريقك كتير “لو منتظم في الغسيل يبقى مش مهم”)

إجمالي الوقت حوالي 10 دقائق فقط (+-).

إقرأ أيضاً:  حرارة المحرك - 4 نصائح هامة عند إرتفاع درجة حرارة المحرك بسيارتك!

ملحوظة مهمة جدا

لو أول مرة تعمل الطريقة دي، مهم إنك تفحص الشاسيه بعينك أو تستعين بعامل المغسلة و تتأكد إن مفيش جزء صاج مكشوف دهان – غالبا بيحصل نتيجة إن ف مرة بطن العربية حكت في بلاعة بارزة. الخ – لأن دي هتكون نواة صدأ و منها بارومة.. لو لا قدر الله لقيت جزء صاج مكشوف.. بتجيب مادة اسمها PVC air dry ياريت سبراي.. بيكون السطح نضيف تماما و خالي من أي صدأ و ترش عليه المادة دي و هي بتنشف في الهواء في خلال 15-30 دقيقة.

سؤال.. أعمل موضوع غسيل شاسيه السيارة ده كل قد إيه؟

  • المفترض لو حضرتك عايش في بيئة قليلة الأتربة زي تونس الخضراء يبقى مرة كل سنة كافية جداً.
  • لكن لو عايش في دولة زي مصر يبقى لازم الموضوع ده يتم مرتين في السنة (لو بتمشي على طرق نظيفة).
  • لو بتنزل في الرملة (لملاك الدفع الرباعي و السيارات الربع نقل و خصوصاً إخواننا في الخليج و ليبيا مثلاً) أو بتمشي في طرق فيها طين و أوحال زي بعض محافظات مصر و السودان كأمثلة.. يبقى المفترض حضرتك تعمل الموضوع ده على الأقل كل 3 شهور و ممكن تقلل المدة حسب كمية الأوساخ العالقة بالشاسيه.

طريقة التشحيم الصحيحة

طيب بنشوف الراجل لو عمل تشحيم بيستخدم إما فرشة أو قطعة خشب أو بلاستيك أو صباعه في بعض الأحيان!

ده مش صح لأنك مش هتقدر توصل لكل الأماكن و الشحم مش هيتغلغل لجوه تفاصيل المفاصل و الأجزاء المتحركة

طيب إيه الصح؟

  • الصح إنه يستخدم مشحمة/ماكينة تشحيم (زي اللي في الصورة) وده من شكلها بتساعدك كتير إنك تشحم بكفاءة.
  • الأماكن الضيقة قوي اللي مش عارف توصلها ممكن تستخدم إسبراي تزييت زي WD-40 على نطاق ضيق فقط. (لو غلبت فقط)
مشحمة
Ebay
إقرأ أيضاً:  تيل الفرامل / الفحمات / Braking pads - علامات وجوب التغيير (هام جدًا)

طب الشحم دوره إيه بالظبط و خصائصه المفترض تبقى إيه؟

الشحم دوره في تقليل الإحتكاك و بالتالي حماية من التآكل في الأجزاء المعدنية، ومنع الأصوات (التزييقات).

طيب خصائص الشحم المطلوبه؟

إنه يكون ثابت.. يستحمل الحرارة العالية.. مقاوم للمياه.. مقاوم للضغوط.

طيب إيه أحسن نوع شحم أستخدمه؟

فيه نوعين أنصح بيهم حسب توصيات NLGI أو المعهد الوطني لزيوت التشحيم.. و هم:

  1. شحم ليثيوم متعدد الأغراض (ممكن تستخدمه في دول زي مصر, الجزائر, المغرب, تونس, الأردن) و ده قوة تحمله للحرارة لغاية 170 درجة مئوية.
  2. في البلاد الحارة زي الخليج العربي (للإستخدام القاسي فقط).. المفترض تستخدم نوع تاني أقوى زي شحم Calcium Sulfonate و ده بيستحمل حرارة لغاية 260 درجة مئوية.
إقرأ أيضاً:  مكيف السيارة - 8 نصائح للحصول على أعلى آداء له في الصيف

فين أماكن التشحيم في السيارة؟

في العربيات الحديثة بما فيها بعض أنواع السيارات النقل الخفيف حضرتك ممكن تشحم المفاصل و الأجزاء المعدنية المتحركة فقط زي ما وضحت فوق و هو شئ بنسبة 90% مش ضروري.

لكن في بعض السيارات الكبيرة المخصصة للطرق الوعرة أو السيارات القديمة فيه أماكن مخصوصة إضافية لحقن الشحم بداخل الميكانيزمات المتحركة من خلال أجزاء إسمها Zerk Fitting أو بنوز تشحيم “بلغة السوق” (زي الصورة المرفقة)

بنوز التشحيم
AliBaba

طريقة التشحيم بإستخدام المشحمة عادي و بننفذ الخطوات ال3 اللي في الصورة المرفقة اللي بعدها.

خطوات التشحيم
James Don (YouTube Channel)

آخر نقطة.. خليك دايماً فاكر إن تمن الغسلة و شوية شحم أقل بكتير جداً من تمن جزء هتغيره.

إقرأ أيضاً:  فرامل اليد / الهاند بريك - إختبرها بنفسك بالطريقة الصحيحة!

أتمنى لكم السلامة على الطريق.
لا تنسى عمل مشاركة/شير لنشر المعلومة، ولايك لصفحتنا على فيسبوك #عن_السيارات.
ورجاء الدعاء لوالدتي ووالدي بالرحمة والمغفرة وأن يجعل العمل في ميزان حسناتهم.

أطيب التحايا،
#أبوجادالله_يكتب
#عن_السيارات


لمتابعة نشر المقالات القادمة لي، قم بالإشتراك في النشرة البريدية الأسبوعية لمنصة المقالة من خلال النموذج بالأسفل و بضغطة واحدة:



الكاتب مسئول عن كتاباته على منصة المقالة.

مساحة إعلانية


⇐ لا تنس عمل مشاركة (Share)

المقالة التالية

الكوبلن وعلامة هامة تحذرك من تلفه و وجوب التغيير "لا تغفلها!"

الأحد مارس 28 , 2021
تمت قراءته: 9٬750 إيه هو الكوبلن ده؟ و وظيفته إيه؟ و إيه اللي يبوظه؟ الكوبلن أو CV Joint / Coupling و ده اﻹسم العلمي بتاعه.. هو الوصلة اللي بتوصل الحركة من الفتيس للعجلات الأمامية (و بيستخدم في سيارات الجر الأمامي فقط أو بعض أنواع الدفع الكلي في العجلات الأمامية برضه) […]
الكوبلن الخارجي للسيارة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: رجاء عدم محاولة النسخ، وعمل مشاركة/شير أو استخدم رابط صفحة المقالة كمرجع في موقعك - جميع الحقوق محفوظة لمنصة المقالة