في المقال ده هتكلم عن خطوات بسيطة و عملية للحصول على أقصى إستفادة من مكيف السيارة خاصة في فصل الصيف، و كمان حاجات بسيطة بتعملها تقدر تحافظ عليه، وفي النص كده خرافات و أساطير منتشرة عن مكيف السيارة و إيه التصحيح بتاعها.
1- أهم عامل لسرعة تبريد مكيف السيارة: التوقف في الظل!
لازم تبقى عارف إن حوالي 80% من سرعة تبريد مكيف السيارة في الصيف، إنك تكون راكن في الضل، و ده شرط مهم جدا و للأسف كتير مش يبقى متوفر.. بس حاول على قد ما تقدر إنك تركن في الضل.. لو فيه إمكانية تغطي السيارة (غطاء ضد المياه المفضض إياه .. ماشي) أضعف اﻹيمان إنك تحط الشماسات على الزجاج من جوه (الزجاج الأمامي/البرابريز, و الأبواب). الموضوع هيحس بقيمته قوي الأصدقاء ملاك السيارات الأوروبي بالذات و ده لأن التكييف في العربيات الأوروبي مصمم على الأجواء بتاعة أوربا.. و بالنسبة للعربيات اللي الصانع مصنعها بمواصفات خليجي النقطة دي بتبقى متحسنة فيها كتير.
2- تخلص من الهواء الساخن بداخل السيارة
لو اضطريت تركن في الشمس لمدة .. مهم جدا بعدها انك تفتح الأبواب الأربعة الأول لمدة دقيقتين تلاتة بس علشان العربية تتهوى و تفقد كتير من الهوا السخن اللي جوه.
- معلومة 1.. في بعض الأيام اللي درجة الحرارة بتوصل ل 40 في الضل.. بيكون درجة حرارة صاج العربية 60-70 مئوية .. ده بيسخن الهوا المحبوس جوا الكابينة بالاضافة لوجود الزجاج من كل ناحية اللي بيخلي العربية عبارة عن صوبة زراعية و الحرارة ممكن في يوم حار زي ده توصل جوه الكابينة من 50-60 مئوية).. و درجة الحرارة المناسبة هي 23 مثلا.. متخيل انت بتطلب من تكييف عربيتك يعمل ايه في الظرف ده؟!
- معلومة 2.. بما إن العربية بيكون فيها مكونات بلاستيك كتير جوه، ف بسبب الحرارة العالية بيتكون هواء فاسد فيه مواد مسرطنة في حالة اﻹستنشاق على المدى الطويل و يجب تهوية السيارة قبل الجلوس فيها.. و ده كلام فريق بحثي من جامعة في آيرلندا و جامعات و هيئات تانية.. و اللي طلع هيئة المجتمع الكيمياء الأمريكي ACS سنة 2007 و قال في تقرير نشره مفيش كلام من ده (و دي جهة محترمة جدا). بس رأيي في المسألة دي خلينا في الأحوط و كده كده انت محتاج تهوي العربية علشان الهوا جوه سخن فمش هتعرف تقعد.
- معلومة 3..(مهمة جدا) في حالة كان معاك طفل و هتروح محل و تيجيب حاجة و ترجع، ما ينفعش و انت راكن عربيتك في الشمس تسيب طفلك في العربية وتعمل لوك.. حتى لو كنت منزل الزجاج شوية صغيرين (مخافة انه يتخطف أو يخرج) و ده لأنه هيعرضه للإعياء الشديد و ممكن اﻹغماء، و لو طفل رضيع و كسلت تشيله ممكن يتوفاه الله (و حصلت في كذا دولة سابقا).. ف نخلي بالنا الله يباركلكم (معلش استحملوا و خدوا طفلكم معاكم).
3- طريقة أخرى للتخلص من الهواء الساخن
بعد التهوية قدامك حل من اتنين.. تقفل الأبواب .. و تفتح الزجاج و تمشي على سرعة 10-15 كم/ساعه.. لمدة دقيقتين تلاتة تانيين و تشغل التكييف و بعدها تقفل الزجاج..
أو.. تفتح مسار الهواء الخارجي اللي هو مهما كان ابرد من الهوا جوه الكابينة (راجع الصورة) و تشغل التكييف على أقل درجة و أعلى مروحة و ترفع الزجاج و تسيب بس مسافه 3 او 4 سم (جرب تحط ايدك و شوف الهوا السخن طالع ازاي) لمدة برضه دقيقتين تلاتة و بعدها خلي مسار الهواء مغلق circulated و توكل على الله.
4- تعمل إيه لو راكن في الشمس و الكراسي جلد؟!
الناس اللي الكراسي عندها فرش جلد .. الله يكون في عونها و خصوصا لو الفرش أسود. (فيه عراقات كده بتباع ، دي بتقلل التأثير شوية). أو إستخدم الشماسات الفضية و ركبها على الزجاج من الداخل لمنع دخول أشعة الشمس.
5- في حالة وجود غبار و أتربة في الجو
لو الجو حار و فيه عاصفة ترابية أو رملية … يبقى ما تعملش الخطوة رقم 3 علشان العربية بالطبع هتتردم تراب و خصوصا فلتر التكييف.. الأفضل ساعتها انك تكون مقفل العربية كويس و تخلي الهواء يدور داخل الكابينة فقط circulated .
6- تعديلات في مكيف السيارة؟
علشان تاخد آداء أعلى من مكيف السيارة.. و خصوصا لملاك الأوروبي.. فيه صنايعية و أحيانا توكيلات للأسف.. بيبعد حساس الحرارة (الثرموستات) شوية علشان يخلي الكمبريسور يشتغل شوية أكتر فيسقع أكتر، و للأسف ده خطأ شائع لأنك بالشكل ده بتعمل حمل أكتر على الكمبريسور باﻹضافة لاستهلاك بنزين زيادة (متوسط إستهلاك الوقود علشان الموتور يدور الكمبريسور باﻹضافة لحمل المروحة الكهربي على سرعة 4 حوالي 1-2 لتر في الساعة في IDLE و انت واقف، و المعدل ده يزيد أو بيقل حسب موديل كل عربية).
و الحل انك تراجع العزل كويس للمواسير الباردة جسها بإيدك لو فيهم حتة مكشوفة و اعزلها.. في حل تاني الصنايعية بيعملوه و هو حل معقول (بس مش أحسن حاجة) انه بيلغي مسار المياه الساخنة اللي داخلة الكابينة علشان الهيتر و ده بيخليك تحس بأقصى آداء للتكييف ، بس للأسف بتكون مضطر تضحي بأوبشن مهم معظمنا مش بيقدر يستغنى عنه في الشتاء و هو الهيتر أو الدفاية. (لو حبيت تعمله لازم حد فاهم ينفذه لك (لازم يفضي السربنتينه الداخلية من المياه وينفضها بالهواء كويس لغاية ما تنشف و كل المسارات و يطبب الأنابيب من حوض الموتور علشان الصدأ.. و لازم يبقى حريص للحفاظ على دورة تبريد المحرك من احتمالية دخول هواء للدورة).
7- تغيير فلتر مكيف السيارة
فلتر التكييف الشركات المصنعة بتنصح تغيره كل 20 – 25 الف كيلو أو كل سنتين.. أيهما أقرب.. و الكلام ده للإستخدام العادي و في بلد المصنع اللي هي غالبا اليابان أو كوريا أو في أوروبا أو أمريكا..الخ .. لكن بلادنا الصحراوية لها طبيعة خاصة و مختلفة بالإضافة لمعدلات التلوث.. طبيعة إستخدامنا ..و نصيحتي الشخصية انك تغير الفلتر على مدد أقل (و ده للحفاظ على صحتك) و ده بالرجوع لحالة الفلتر .. أو انك تفكه كل 3 شهور و انت في المغسلة و تنفضه بالهواء (الصورة ده الفلتر بتاع عربيتي لما فكيته مرة علشان انفضه بالهواء بعد 5 شهور فقط!) الطريقة سهلة و ممكن تغيره بنفسك و فيه فيديوهات كتير على اليوتيوب بتشرح كل موديل الفلتر بتاعه بيتغير ازاي.
8- طريقة إطالة عُمر فلتر المكيف (خاصة في الدول الصحراوية)
فيه نصيحة بتتقال إنك علشان تحافظ على فلتر عربيتك إقفل دايماً دايرة التهوية circulated و الهواء يلف داخل الكابينة فقط.. و الموضوع ده بيحافظ فعلا بشكل كبير.. بس احذر مع السواقة لمدد طويلة.. لانك هتحس انك مخنوق و ده طبيعي لأن الأكسجين اللي في الكابينة الناس بتستهلكه و هتكونوا محتاجين هواء فريش من بره.. سواء تفتح الزجاج كل ساعتين تلاتة أو تفتح مسار الهوا من الخارج شوية و بعدين رجعه تاني للحفاظ على الفلتر.
هكمل في أسبوع لاحق بمشيئة الله (معلومات جديدة و تصحيح مفاهيم خطأ) بخصوص التكييف و صياناته.
أتمنى لكم السلامة على الطريق.
لا تنسى عمل مشاركة/شير لنشر المعلومة، ولايك لصفحتنا على فيسبوك #عن_السيارات.
ورجاء الدعاء لوالدتي ووالدي بالرحمة والمغفرة وأن يجعل العمل في ميزان حسناتهم.
أطيب التحايا،
#أبوجادالله_يكتب
#عن_السيارات
لمتابعة نشر المقالات القادمة لي، قم بالإشتراك في النشرة البريدية الأسبوعية لمنصة المقالة من خلال النموذج بالأسفل و بضغطة واحدة:
الكاتب مسئول عن كتاباته على منصة المقالة.
مساحة إعلانية
مهندس و كاتب و مصور فوتوغرافي من مصر، يعمل في مجال صناعة السيارات منذ عقد من الزمان، حاصل على العديد من الجوائز.
