الميعاد المعتاد لطرح الموديلات الجديدة
قبل ما نتكلم على VIN لازم نتكلم الأول على ميعاد طرح موديل السنة الجديدة و عادة بيتم طرحه بدءا من أكتوبر ..حتى ديسمبر السنة اللي قبلها و ممكن يكمل..
بمعنى موديل 2021 تم طرحه بالفعل لعدد من الشركات و فيه شركات لسه هتطرحه بما إننا عدينا ديسمبر..
كثرة المعروض و قلة الطلب
و بسبب التضخم اللي تعرض له اﻹقتصاد المصري مؤخرا, فحصل كساد, بمعنى إن الناس ما بقيتش مقبلة على شراء السلع.. و منها السيارات..
فحصل إن بقى فيه مخزون و الموزعين عايزين يخلصوا منه ﻷن الفترة دي بتاعة نزول الموديل الجديد.. ف فيه موزعين بتحرق سعر شوية علشان يبيع.. و فيه موزعين ما عندهمش ذمة ما عرفش يخلص من المخزون ف بيبيع اللي عنده على انه موديل السنة الجديدة – بس ده في حالة ان مفيش فيس ليفت و الشكل واحد – و ممكن تروح ترخص في المرور تفاجئ إنه كاتب في الرخصة موديل 2017 او 2016 مثلا!
أحيانا بتبقى غلطة من المرور -وده نادر- و أحيانا لأ..
طب لو مش غلطة.. المرور عرف منين موديل السنة؟
ما هو VIN
العربية بيبقى لها حاجة اسمها VIN و اللي هي Vehicle Identification Number.. و مجازا بيتقال عليه في مصر رقم الشاسيه لكنه زي البصمة الجينية كده للعربية تقدر تعرف منه بلد المنشأ و المصنع اللي اتجمعت فيه لغاية خط التجميع نفسه و مش كده و بس .. ممكن تعرف تفاصيل فنية عن العربية و معلومات عن الموتور مثلا و السيفتي اللي في العربية .. عدد الركاب.. بنية العربية … الخ
VIN هوية العربية
هو من اسمه فعلاً “هوية” للعربية و تقدر تعرف طبعا السنة اللي اتجمعت فيها العربية دي.
المرور بيعرفها بسهولة, و انا هقولك تعرفها ازاي علشان تتأكد قبل ما تشتري إن الموزع ده مظبوط ولا بيغشك.
و تنويه لازم طبعا: مش كل شركات السيارات بتلتزم بالأيزو في الحتة دي لكن المعظم شغال بيها.. و في كل الأحوال المراجعة قبل الشراء مش هتخسر.
بنية VIN
ال VIN مكون من 17 حرف و رقم. الحرف العاشر من الشمال أو التامن من اليمين, عبارة عن كود بيدل على سنة الصنع.
يعني مثلا:
A = 2010
B = 2011
C = 2012
D = 2013
E = 2014
F = 2015
G = 2016
H = 2017
J = 2018
K = 2019
لو جبنا الرقم ده 1G4PT5SV2E4114234 أقدر أعرف إن العربية دي موديل سنة 2014
الجدول الكامل في الصورة المرفقة
و لو حابب تعرف تفاصيل عن الVIN بتاع عربيتك أكتر اعمل بحث على VIN Decoder و هتلاقي منهم كتير (مثال: VINCARIO) و هتعرف معلومات أكتر عن عربيتك (نادرا الديكودر بيفشل لان الشركة المصنعه مش بتبقى ماشية على المواصفة بس الموضوع وارد).
في الأخير حابب أقول إني تشرفت إني في يوم من الأيام, كنت واحد من الفريق اللي اشتغلوا على المواصفة بتاعة ال VIN في مصر في هيئة المواصفات و الجودة المصرية.
أتمنى لكم السلامة على الطريق.
لا تنسى عمل مشاركة/شير لنشر المعلومة، ولايك لصفحتنا على فيسبوك #عن_السيارات.
ورجاء الدعاء لوالدتي ووالدي بالرحمة والمغفرة وأن يجعل العمل في ميزان حسناتهم.
أطيب التحايا،
#أبوجادالله_يكتب
#عن_السيارات
لمتابعة نشر المقالات القادمة لي، قم بالإشتراك في النشرة البريدية الأسبوعية لمنصة المقالة من خلال النموذج بالأسفل و بضغطة واحدة:
الكاتب مسئول عن كتاباته على منصة المقالة.
مساحة إعلانية
مهندس و كاتب و مصور فوتوغرافي من مصر، يعمل في مجال صناعة السيارات منذ عقد من الزمان، حاصل على العديد من الجوائز.
