في الأيام الباردة بيتكثف بخار الماء على زجاج السيارة، وبيكون التكثيف على السطح الداخلي، وفي بعض الليالي الصيفية شديدة الرطوبة، وخاصة في المدن الساحلية؛ بيحصل تكثف لبخار الماء اللي في الجو على السطح الخارجي للسيارة.
في المقالة دي يهمنا طريقة إزالة تكثف بخار الماء على زجاج السيارة الخلفي، سواء على السطح الداخلي أو على السطح الخارجي، بطريقة سهلة في خلال دقيقة وبضغطة زر فقط.
ما هو سبب تكثف بخار الماء على زجاج السيارة عموماً؟
تكثف بخار الماء بيحصل عموماً لما الجو يكون فيه رطوبة مرتفعة نسبياً (الرطوبة هي نسبة بخار الماء في الهواء أو بمعنى تاني جزيئات الماء الدقيقة العالقة في الجو). و بمجرد ما يكون فيه سطح بارد -في حالتنا هنا زجاج السيارة- بيحصل تكثف لبخار الماء و يتحول من بخار لجزيئات ماء صريحة.
فعلى سبيل المثال، في الشتاء بيكون الجو داخل السيارة دافئ نسبياً بسبب تشغيل السخان أو بسبب حرارة أجساد الركاب، و الزجاج نفسه بارد بسبب برودة الجو. و بالتالي الأبخرة الناتجة من تنفس أو أجساد ركاب السيارة بتتكثف على السطح الداخلي لزجاج السيارة.
على النقيض في الليالي الصيفية شديدة الرطوبة، بيكون الجو حار و الركاب مشغلين مكيف السيارة و ده بيساعد على تبريد الزجاج و خاصة مع حركة السيارة، و بالتالي بخار الماء اللي في الجو بيتكثف على السطح الخارجي لزجاج السيارة.
لماذا نهتم بتكثف بخار الماء على زجاج السيارة؟
علشان ده بيكون عائق للرؤية أثناء القيادة، فالبنسبة مثلاً للزجاج الخلفي؛ صناع السيارات بيدمجوا مع الزجاج الخلفي سخان كهربائي بيسخن الزجاج، وبالتالي بيمنع تكثف أي بخار ماء. (و ده لأن فيزيائيا علشان بخار المياه اللي في الجو يتكثف و يرجع للصورة السائلة لازم سطح بارد “اللي هو الزجاج في حالتنا” زي ما شرحت في الفقرة اللي فاتت).
طيب شكله إيه السخان ده؟ وبشغله إزاي؟
السخان ده بيكون عبارة عن أسلاك عرضية بعرض الزجاج الخلفي (و هو من المواصفات القياسية لازم يكون في كل العربيات) و بيمر فيه تيار كهربي بيؤدي للتسخين (زي الصورة المرفقة).
بتشغله إزاي… بيكون فيه زرار في التابلوه قدامك عليه الشكل (اللي في الصورة المرفقة). بتدوس عليه و لمبة بتنور فيه (بيان إنه شغال).
طيب مش لو نسيته شغال ممكن الزجاج يسخن قوي و يفرقع؟!!
واﻹجابة: لا مش هيحصل، لأن الأوبشن ده شغال بتايمر بيقعد من 5-15 دقيقة حسب نوع العربية و بعدها بيفصل أتوماتيك.
طيب ليه ما يعملوش زيه في بقية الزجاج بتاع العربية.. ما كله بيشبر؟ و إشمعنى الزجاج الخلفي؟
و ده لأن الزجاج الخلفي بعيد عن إيد السائق أثناء القيادة و الآداة دي مهمة جدا ليه علشان يشوف كويس.. صحيح فيه موديلات فيها مساحة خلفية بس دي بتشيل من الخارج فقط.. و بالنسبة للزجاج الأمامي فيه مساحات من بره، و من جوه قريب من إيد السائق أو إنه يشغل الهواية الداخلية الخاصة بالزجاج الأمامي. و زجاج الأبواب مش حيوي زي الزجاج الأمامي و الخلفي ما عدا الجزء الخاص بالرؤية من المرآة الجانبية.
طب أنا شغلته و الزجاج فرقع!
هنا تحطم الزجاج بيكون بسبب علّة أو عطل في الدائرة الكهربائية الخاصة بسخان الزجاج الخلفي، ومش بسبب الأوبشن نفسه. فلازم المراجعة على دائرة السخان الكهربائية عند المختص و التأكد من سلامة التوصيلات، و عمل كل المكونات و خاصة التايمر.
أتمنى لكم السلامة على الطريق.
لا تنسى عمل مشاركة/شير لنشر المعلومة، ولايك لصفحتنا على فيسبوك #عن_السيارات.
ورجاء الدعاء لوالدتي ووالدي بالرحمة والمغفرة وأن يجعل العمل في ميزان حسناتهم.
أطيب التحايا،
#أبوجادالله_يكتب
#عن_السيارات
لمتابعة نشر المقالات القادمة لي، قم بالإشتراك في النشرة البريدية الأسبوعية لمنصة المقالة من خلال النموذج بالأسفل و بضغطة واحدة:
الكاتب مسئول عن كتاباته على منصة المقالة.
مساحة إعلانية
مهندس و كاتب و مصور فوتوغرافي من مصر، يعمل في مجال صناعة السيارات منذ عقد من الزمان، حاصل على العديد من الجوائز.
اول مرة اعرف
شكرا لك
شكراً جزيلاً