أسباب زيادة استهلاك البنزين – تعرف على أهم 10 أسباب

.”يا باشمهندس! معدل إستهلاك البنزين عندي عالي!! أعمل إيه؟؟!! جربت حاجات كتير و مش جايبة نتيجة! إيه هي أسباب زيادة استهلاك البنزين؟”

شكوى تكررت في التعليقات على صفحتنا على فيسبوك بالفعل, و هي حاجة تهمنا كلنا كمستخدمين للسيارات بلا استثناء، و بناءًا عليه المقال المرة دي هيكون عن:

أسباب زيادة استهلاك البنزين: أهم 10 أسباب

في المقال ده هتكلم عن أهم الأسباب و تفسيرها بالترتيب حسب الأهمية و اللي ممكن تراجع عليها (زي ليستة كدة check list) و إن شاء الله تلاقي اﻹستهلاك إتظبط.

أسباب زيادة استهلاك البنزين
Reddit

1- دواسة / بدال البنزين و تأثيرها المباشر في إستهلاك البنزين

أول حاجة هي دواسة البنزين!! ، خلينا نكون متفقين إن سبب زيادة اﻹستهلاك إنك تضخ كمية كبيرة من البنزين للموتور و تتحرك بيه مسافة قليلة و الموضوع ده ما بيجيش غير عن طريق حاجة واحدة بس (دواسة البنزين) و الموضوع ده له سببين:

الأول لو إنت غاوي تقرص على دواسة البنزين و كيك داون و حركات اعرف ان المعدل لازم يبقى عالي مهما هتعمل.

تاني سبب انه يكون فيه مشكلة فنية تجبرك انك تدوس اكتر على دواسة البنزين علشان التسارع/السحب بتاعها بقى بعافية، و ده اللي هتكلم عليه في النقاط الجاية.

2- فلتر الهواء – أسباب زيادة استهلاك البنزين

تاني حاجة هي فلتر الهواء بتاع الموتور و ده علشان غالبا الناس بتنساه للأسف.. الفلتر ده لما بيتسد جزئيا بيقلل كمية الهواء اللي داخلة للمحرك و بناءًا عليه السحب بيقل و بتلاقي نفسك بتفعص دواسة البنزين علشان العربية تجري معاك و طبعا ده معناه إستهلاك بنزين زيادة.

و علاج الموضوع ده ممكن تخليها عادة كده كل شهرين و انت بتغسل عربيتك في المغسلة انك تفكه و تنضفه بالهواء

(بتضرب فيه الهواء عكس إتجاه سريان الهواء الطبيعي فقط مش من كل الاتجاهات و ده علشان تاخد احسن نتيجة).

لو انت في بلد او مدينة صحراوية يبقى خليها كل شهر. و لو حصل ان فيه عاصفة رملية/ترابية مشيت فيها يبقى نضفه بعدها في اقرب غسلة.

و الافضل انك تغيره كل 10 الاف كيلو متر.

إقرأ أيضاً:  عاصفة ترابية / رملية - أهم 10 نصائح تأكد من عملها في الأجواء العاصفة

مساحة إعلانية


3- جودة البنزين و تأثيرها على إستهلاك “البنزين” !

تالت أهم حاجة هي نوعية البنزين نفسها اللي بتحطها للعربية, لو البنزين سئ و عليه مياه او شوائب بالتبعية سحب العربية هيقل و هتضطر تقرص على البنزين و ده برضه إستهلاك زيادة, فلازم تختار البنزينة اللي هتحط بنزين منها و ثبت بنزينة واحدة بس علشان لو حصل اي حاجة تبقى عارف ان هي دي البنزينة دي بعينها.

إقرأ أيضاً:  جودة البنزين و أهم النصائح للحفاظ على محرك سيارتك

مساحة إعلانية


4- ضغط الهواء بالإطارات – أسباب زيادة استهلاك البنزين

ضغط اﻹطارات هنا رقم 4 علشات بنتكلم على معدل اﻹستهلاك للبنزين بس لو هيتم تصنيفه من وجهة نظر الأمان safety هيبقى رقم 1..

ضغط اﻹطارات لازم يكون مظبوط في كل الأحوال لو زيادة خطر عليك و إهلاك أسرع للعفشة.

و لو الضغط قليل يبقى معدل إستهلاك البنزين هيزيد, و التفسير العلمي للموضوع ده ان لما الضغط بيقل مساحة السطح بتاعة الكاوتش اللي بتكون ملامسة للطريقة (المداس) بتزيد و ده معناه إنك بتحتاج قوة أكبر من الموتور علشان تحرك العربية و بتترجم القوة الأكبر لعزم أكبر و بالتالي معدل بنزين أعلى.

و الأفضل إنك تربط أسبوعياً او كل اسبوعين كده زيارتك لمحطة البنزين بظبط ضغط اﻹطارات و اختار البنزينة اللي فيها Digital tire inflator المنفاخ اللي بشاشة رقمية و بيفصل لوحده لضمان الدقة و انك تتأكد إن الاربع اطارات زي بعض علشان الاتزان و الثبات على الطريق.

5- البوجيهات! – أسباب زيادة استهلاك البنزين

البوجيهات الأفضل انها تتغير كل 20 الف كيلو او حسب توصية الصانع، لان لما كفائتها بتقل ، كفاءة اﻹحتراق بتقل و بالتالي انا مش بستفيد من كل البنزين اللي داخل غرفة الحريق في المحرك.

6- الرشاشات Gasoline Injectors – أسباب زيادة استهلاك البنزين

الرشاشات gasoline injectors و دي بسبب نوعية البنزين السيئة اللي اتكلمنا عليها بيحصل فيها سدد جزئي او انها بتفقد خاصية الرش spray و بينزل منها البنزين على شكل سيل كده او خط stream .. و الأفضل انها تتفك و تتنضف.

حد ممكن يقولي طب انت لغاية دلوقتي ما جيبتش سيرة طرمبة البنزين او فلتر البنزين .. هقولك ان قلة كفاءتهم هتأثر بشكل مباشر على سحب العربية لكن مش هيزودوا معدل اﻹستهلاك (موضوع تركيزنا في المقال ده) و ده لأنهم بيطلعوا اصلا معدل قليل نظرا لضعف الطرمبة او ان الفلتر مكتوم شوية.

7- علبة / دبة البيئة Catalytic Converter – أسباب زيادة استهلاك البنزين

علبة البيئة catalytic converter و دي بسبب البنزين السئ بيحصل فيها سدد جزئي مع الوقت. و بالتالي بتقلل مرور العادم من خلالها و ده بيضعف من قوة الموتور. و علشان تجري العربية معاك بتضطر تقرص على دواسة البنزين و بالتبعية برضه معدل استهلاك زيادة.

و العلاج انها بتتفك تتنضف و تركب تاني.

(و ما نصحش بالمنتجات اللي بتنضف عن طريق خرطوم السحب في الموتور. لأنها في بعض الأحيان و في ظروف معينة بتؤدي لأضرار جسيمة في الموتور)

إقرأ أيضاً:  علبة البيئة/المحول الحفاز - ما هي و كيف تحافظ عليها؟!

مساحة إعلانية


8- ثرموستات المحرك (ثرموستات الكوعة) – أسباب زيادة استهلاك البنزين

ثرموستات الكوعة .. و دي بالنسبة للناس اللي شايلنها و بيتحركوا بالعربية على طريق مفتوح في الشتاء (ربنا معاكم).

و ده لأن أحسن معدل إستهلاك تقدر تاخده من الموتور على درجة حرارة التشغيل المثلى حوالي 85 مئوية.

و وظيفة الثرموستات انها تحافظ على الدرجة دي لكن في درجات الحرارة المنخفضة و خاصة مع السفر على سرعات معدل التبريد بيكون عالي. و بالتالي الموتور بيبرد عن درجة الحرارة المثلى و ده بيرفع معدل إستهلاك البنزين. ده غير زيادة نسبة اﻹهلاك في أجزاء المحرك الميكانيكية.

نصيحة: إعرف سبب المشكلة بالظبط اللي بترفع الحرارة و عالجها و رجع الثرموستات تاني.

9- حساس العادم (حساس الأكسجين)

exhaust sensor
سنسور الأكسجين أو حساس الشكمان

بسبب البنزين السئ بتتكون عليهم طبقات كربونية عازلة و بتقلل كفاءتهم. و وظيفتهم انهم هم اللي بيبعتوا الاشارة للكمبيوتر بتاع العربية و بيقرر بناءا عليه نسب البنزين للهواء.. و العلاج بيتفكوا و يتنضفوا او بيتغيروا لو باظوا خالص.

إقرأ أيضاً:  أعطال المحرك - كشف لغز الظهور المتكرر لعلامة Check Engine

مساحة إعلانية


10- بوابة الهواء Air Throttle Body

و دي مع الوقت بيتكون عليها طبقات زيتية و غبار. فبتعمل زي عجين و بتقلل كفاءة عملها و الافضل انها تتفك و تتنضف بره يدوياً.

بلاش تستخدم اسبراي منظف لانك هتدخل الوساخة كلها على المحرك.

هل فيه أسباب تانية ممكن تزود معدل إستهلاك البنزين؟

فيه أسباب تانية زي انك تتخلص من المتعلقات اللي في شنطة العربية اللي ملهاش لازمة و مزودة الوزن و غيرها.

و نقدر نستخلص منهم (لو عربيتك حالتها كويسة او زيرو):
(الضغط المعتدل على دواسة البنزين + جو نضيف بدون اتربة بلاش سواقة في العواصف الرملية + بنزين نضيف) = معدل إستهلاك بنزين ممتاز

اي خلل في اي متغير في المعادلة دي لازم تبتدي المشاكل.. فخلوا بالكم و ربنا يسلم طريقكم.

إقرأ أيضاً:  جودة البنزين و أهم النصائح للحفاظ على محرك سيارتك

أتمنى لكم السلامة على الطريق.
لا تنسى عمل مشاركة/شير لنشر المعلومة، ولايك لصفحتنا على فيسبوك #عن_السيارات.
ورجاء الدعاء لوالدتي ووالدي بالرحمة والمغفرة وأن يجعل العمل في ميزان حسناتهم.

أطيب التحايا،
#أبوجادالله_يكتب
#عن_السيارات


لمتابعة نشر المقالات القادمة لي، قم بالإشتراك في النشرة البريدية الأسبوعية لمنصة المقالة من خلال النموذج بالأسفل و بضغطة واحدة:



الكاتب مسئول عن كتاباته على منصة المقالة.

مساحة إعلانية


 

⇐ لا تنس عمل مشاركة (Share)

المقالة التالية

الإستبن لم يلمس الأرض! - خرافات تقرأها في إعلانات بيع السيارات المستعملة

الأثنين مارس 15 , 2021
تمت قراءته: 5٬494 كتير و احنا بنقرأ إعلانات بيع السيارات المستعملة, بنقرأ جملة “إستبن لم يلمس الأرض”, و ممكن تكون العربية دي موديلها عدى عليه أكتر من 10 سنين! فهل دي ميزة فعلاً؟! و انت بتغير الإطارات لا تنسى “الإستبن”! ضروري و انت بتغير إطارات السيارة الأربعة انك تراجع برضه […]
الإطار الإستبن

2 تعليقات على “أسباب زيادة استهلاك البنزين – تعرف على أهم 10 أسباب

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: رجاء عدم محاولة النسخ، وعمل مشاركة/شير أو استخدم رابط صفحة المقالة كمرجع في موقعك - جميع الحقوق محفوظة لمنصة المقالة