تساءل أحد الأخوة الكرام من الأردن الشقيق:
حابب أوضح نقاط مهمة كأعراض جانبية هتحصل للحركة دي، وتصحيح لبعض المفاهيم الخاطئة المنتشرة على منصات التواصل الإجتماعي..
النقل من D إلى N أثناء الحركة – هل حقًا لها مزايا؟
1. عند فصل الفتيس / الجير والنقل لوضعية N سواء أتوماتيك أو مانيوال على منزل كوبري.. بيزيد من سرعة السيارة بسبب فصل حركة الموتور -اللي كان بيعمل نوع من تقليل التسارع على منحدر- وبيخليك تحس انها خفيفة و التحكم فيها أصعب. (فبلاش الحركة دي للحفاظ عليك و اللي معاك). 2. علشان تسيطر على سرعة عربيتك المتزايدة على المنزل / المنحدر من خلال الضغط نسبيًا على الفرامل ده بيؤدي ﻹستهلاك زيادة في تيل الفرامل (لو هي عادة عندك.. يبقى هتغير التيل و من ثم الطنابير بشكل أكتر من معدلاتهم الطبيعية). 3. في الفتيس / الجير الأتوماتيك من الخطر جدًا الحركة بتاعة النقل من D إلى N أثناء الحركة لأن دورة تبريد الزيت في كتير جدًا من الفتايس معتمدة على حركة الموتور.. عند فصل حركة الموتور بتتوقف دورة الزيت وبما إن العربية ماشية فبيكون لسه فيه أجزاء في الفتيس متحركة لأنها مرتبطة بحركة العجل، الموضوع ده بيؤدي على المسافات الطويلة والتكرار لسخونة زائدة Over Heating في الفتيس / الجير الأتوماتيك وبيؤدي لتلفيات مميتة للفتيس!ملحوظة هامة
أغلب صناع السيارات بيكتبوا توصية مهمة إنه عند تعطل السيارة ذات الفتيس الأتوماتيك يتم رفعها على ونش ولو مش متاح بتجيب الفتيس على وضع N وأقصى مسافة للقطر 40 كيلو متر.
4. ده غير إنه من الخطر جدًا نقل الفتيس من N إلى D (العكس) والعربية ماشية لأنه مع الوقت الحركة دي هتدمر الفتيس من جوه. (فيه عربيات الفتيس مش بيسمح بالحركة دي أساسًا). 5. في الفتيس / الجير المانيوال نفس الحركة لو نقلت من N لغيار مش هتكون خطر إلا لو اخترت نقلة أقل من المطلوب علشان انت كده وقتها بتعمل تحميل كبير جدًا على أسطوانة الدبرياج و هتستهلك أسرع.. والأخطر هو التحميل المفاجئ على الموتور (الدخول في منطقة RPM الحمراء) مع التكرارية ممكن يؤدي لتلفيات في أجزاء المحرك الداخلية.(مثال: ماتبقاش ماشي 80 .. و تنقل من مور للتاني أو حتى التالت.. انقل للرابع أو الخامس.. و سقط نقلات بعدها براحتك بما يتناسب مع السرعة).
خد بقى المفاجأة دي!
6. موضوع إنك تعمل مور N للفتيس وانت ماشي سواء في طريق مستوى أو منزل.. علشان توفر بنزين مابقاش له لازمة في السيارات الحديثة!لأن انت بمجرد ما تشيل رجلك بالكامل من على دواسة البنزين والعربية ماشية بسرعة.. الكمبيوتر بيوقف عمل رشاشات الوقود أتوماتيك مؤقتًا لغاية ما تدوس بنزين تاني.. و الدليل على الكلام ده تقدر تشوفه بنفسك من لوحة العدادات (تحديدًا معدل الحرق اللحظي للوقود).. هتلاقي الرقم – و ياللمفاجأة – بقى 0 لتر / 100كم (جربها بنفسك في مرة)
ده فيديو عملته بنفسي كمثال عملي:
(ممكن حد يسألني طب إزاي كل حاجة بتبقى شغالة و الكمبيوتر قاطع البنزين على الموتور؟!
هقولك إن العربية ماشية و في وضع الإستعداد Standby .. الموتور بيلف عادي خالص علشان الحركة مش مفصولة عن الفتيس و الدينامو بيلف بالتبعية و بيغذي العربية كلها بالكهرباء المطلوبة و كمان طرمبة المياه..الخ..)
7. الموضوع بيفرق في العربيات القديمة المانيوال بس (زي اللادا و الفيات القديم بأنواعه.. الخ .. العربيات اللي مفيهاش وحدة تحكم أو ECU / كمبيوتر العربية) والمانيوال فقط. الأتوماتيك غلط زي ما وضحت ننقل و العربية ماشية. ولو على منحدر ماتعملش موضوع النقل من D إلى N أثناء الحركة سواء كان الفتيس / الجير أتوماتيك أو مانيوال حفاظًا على سلامتكم.(الصورة المرفقة لكوبري في اليابان فظيع جدًا لأن درجة انحداره عالية، زي ما باين كده و اسمه Eshima Ohashi Bridge)
أتمنى لكم السلامة على الطريق.
لا تنسى عمل مشاركة/شير لنشر المعلومة، ولايك لصفحتنا على فيسبوك #عن_السيارات.
ورجاء الدعاء لوالدتي ووالدي بالرحمة والمغفرة وأن يجعل العمل في ميزان حسناتهم.
أطيب التحايا،
#أبوجادالله_يكتب
#عن_السيارات
لمتابعة نشر المقالات القادمة لي، قم بالإشتراك في النشرة البريدية الأسبوعية لمنصة المقالة من خلال النموذج بالأسفل و بضغطة واحدة:
الكاتب مسئول عن كتاباته على منصة المقالة.
مساحة إعلانية
مهندس و كاتب و مصور فوتوغرافي من مصر، يعمل في مجال صناعة السيارات منذ عقد من الزمان، حاصل على العديد من الجوائز.
