اﻹيرباج / الوسائد الهوائية وأكثر الأسئلة شيوعًا و”أهمية”!

“تاريخ صلاحية اﻹيرباج؟”.. “ازاي أعرف إن المنظومة شغالة كويس بنفسي؟”.. “ازاى افصل اﻹيرباج؟”.. أكثر الأسئلة شيوعًا مؤخرًا.

اﻹيرباج - الوسائد الهوائية
Tuningblog

بعد الحادث المفجع الخاص باﻹيرباج.. ناس كتير من خلال البحث على اﻹنترنت قرأت عن صلاحية اﻹيرباج أو الوسادة الهوائية.. و فيه اسئلة كتير انتشرت.. هحاول هنا إني أجمع معظمهم.. وأجاوب عليهم.

و أنصحكم بقراءة المقالات السابقة ليا عن منظومة الأمان في السيارة.. اﻹيرباج و حزام الأمان..الخ (هتفرق معاكم كتير إن شاء الله): إضغط هنا

هل اﻹيرباج له تاريخ صلاحية؟

السؤال الأول: انتشر السؤال “هل اﻹيرباج له تاريخ صلاحية؟” و للأسف ناس كتير جاوبت بأنه له تاريخ صلاحية 5 سنين و خلاص، دون الرجوع للمختصين من صناع سيارتها (المختص هنا لا يمكن يكون صنايعي أو تاجر زي ما بعض الأخوة بيعمل) أو الحل التاني بالرجوع للمصادر الموثوق منها.

و إجابة السؤال ده: حسب تاريخ انتاج السيارة!

في السيارات القديمة .. كان وارد تحلل الخامة الخاصة بالايرباج نفسها.. أو تسرب مواد (زي بخار المياه الموجود بسبب نسبة الرطوبة العالية) لضعف تقنية العزل الخاصة وقتها لداخل النافخ الخاص باﻹيرباج.. و كان معظم شركات السيارات بتوصي بمراجعة اﻹيرباج كل 6-10 سنوات (وكان على رأسهم شركة مرسيدس) وكانت بعض الشركات بتكتبها صراحة كبند من بنود الصيانة الدورية في الكتالوج الخاص بها (دليل المستخدم).

لكن مع تطور تكنولوجيا صناعة السيارات وأجزائها، والتوصل لمواد كيميائية ثابتة ومستقرة.. وإختراع مواد عازلة أقوى.. والتطور الكبير في الأنظمة اﻹلكترونية وتحديدا من بعد سنة 1990.. معظم الموديلات اللي انتجت من بعد السنة دي مش بتحتاج لتغيير وتاريخ الصلاحية مدى الحياة (إلا إذا تم ذكرها في كتيب دليل اﻹستخدام الخاص بسيارتك).

استثني من القاعدة دي فقط بعض اﻹيرباجز المعيوبة من انتاج تاكاتا واللي تعرضت لها في مقال سابق ، وما عدا ذلك اﻹيرباج مش محتاج فحص أو صيانة أو تغيير بعد عدد سنوات معينة ((إلا إذا ذكر ذلك صراحة في كتيب دليل المستخدم زي ما ذكرت سابقًا)).. فالبعض القليل من الشركات دلوقتي بتطلب منك تغيير وحدات اﻹيرباج بعد 10 سنين.. وكتير منهم مش بيطلب.

لازم تراجع في كتيب دليل المستخدم الخاص بسيارتك.. و لو كنت شاريها مستعملة ومش موجود معاك.. تقدر تعمل عليه بحث على اﻹنترنت و تنزله Pdf ببلاش من مواقع كتير.

إقرأ أيضاً:  حزام الأمان - سبب أهميته و أخطاء شائعة عند إرتداؤه تبعياتها بالغة الخطورة!

إزاي أعرف إن منظومة اﻹيرباج دي حصل فيها خلل ولا لأ؟

السؤال التاني: انتشر قوي برضه و شايفه منطقي جدًا: “إزاي أعرف إن منظومة اﻹيرباج دي حصل فيها خلل ولا لأ؟ و ف نفس الوقت مش مكتوب في الكتيب ان لها تغيير أو صيانة؟!”

زي ما وضحت في النقطة السابقة.. إن ميزة كبيرة قوي تطور اﻷنظمة اﻹلكترونية في السنين اللي فاتت والثمرة بتاعة التطور دي هي إمكانية مراقبة كفاءة وصحة كل نظام موجود في السيارة عن طريق حساسات متنوعة.. و الحساسات دي بتشتغل كل لحظة علشان تنقل للكمبيوتر الموقف وبناء عليه كمبيوتر السيارة بياخد القرار في أجزاء من الثانية.. وبيعرض ليك لمبة تحذيرية.. أو صوت تحذيري.. أو عدم السماح بتشغيل المحرك في بعض الحالات الخاصة كمثال.

وإجابة السؤال ده: (عينك على لوحة العدادات قدامك في بداية تشغيل الموتور).

أول لما بتشغل المحرك.. لمبات كتير بتنور: زي البطارية.. المحرك.. درجة الحرارة.. الخ و “لمبة اﻹيرباج”.. وبعد ثواني كلهم بيطفوا تاني.. في الثواني القليلة دي كمبيوتر العربية بيراجع على كل الأنظمة.. و لما بيلاقيهم تمام بيطفي اللمبات.

فالوضع الطبيعي في العربيات الحديثة.. انك مع كل تشغيلة لموتور سيارتك.. العربية بتفحص نفسها ولو فيه حاجة مش طبيعية الكمبيوتر هيبلغك بيها.

فلازم اول ما تشغل أجهزة السيارة (تاني تكة كونتاكت – أو ضغطة زر تشغيل المحرك).. عينك على لمبة اﻹيرباج.. الحالات الجاية فقط تستدعي انك تودي عربيتك لمكان متخصص للفحص:

  1. لو منورتش من الأساس يبقى فيه خلل حصل.
  2. لو نورت مع بقية اللمبات و كلهم طفوا ماعدا هي.. يبقى فيه خلل موجود.
  3. لو كنت ماشي بالعربية طبيعي و نورت لوحدها يبقى برضه فيه خلل أو عطل حصل.
  4. لو كنت ماشي و بدأت تنور و تطفي .. فالأفضل انك تسوق العربية بحرص شديد و توديها للمتخصصين في أقرب فرصة ممكنة.

اللمبة المقصودة طبعا هي لمبة الأعطال في التابلوه (زي الصورة المرفقة) والأصول إنك تكون لابس حزام الأمان.

لمبة اﻹيرباج - لمبة الوسائد الهوائية
Angie’s List

إزاي أفصل الإيرباج؟

السؤال التالت: “لا ياعم.. موضوع اﻹيرباج ده يخوف.. أنا عايز أفصله.. أفصله إزاي؟!”

ناس كتير برضه اتبرعت بطرق لفصل الإيرباج.. و عايز أقولهم اتقوا الله.. اﻹيرباج وسيلة حماية حياة في منتهى الأهمية.. و أنقذت أرواح آلاف الناس بالفعل.. لو اﻹيرباج مش مهم مكانتش هيئات و منظمات عالمية في دول محترمة أجبرت صناع السيارات إنه يبقى إجباري..

لو قلقان بس يكون فيها مشكلة تقدر تراجع برقم شاسيه العربية (زي ما ذكرت الطريقة بالتفصيل في المقال السابق) أو إنك توديها لمركز متخصص معتمد.

حاجة أخيرة عايز أقولها لكل الناس اللي حبت تستغل الموقف وتشيع حالة من الفزع والخوف بين الناس علشان أغراض الله أعلم بيها.. والناس اللي ماعندهاش علم وبتفتي بكل صدر رحب .. اتقوا الله..

 

إقرأ أيضاً:  الوسائد الهوائية (اﻹيرباج): لماذا لم تنطلق في الحادث؟!

أتمنى لكم السلامة على الطريق.
لا تنسى عمل مشاركة/شير لنشر المعلومة، ولايك لصفحتنا على فيسبوك #عن_السيارات.
ورجاء الدعاء لوالدتي ووالدي بالرحمة والمغفرة وأن يجعل العمل في ميزان حسناتهم.

أطيب التحايا،
#أبوجادالله_يكتب
#عن_السيارات


لمتابعة نشر المقالات القادمة لي، قم بالإشتراك في النشرة البريدية الأسبوعية لمنصة المقالة من خلال النموذج بالأسفل و بضغطة واحدة:



الكاتب مسئول عن كتاباته على منصة المقالة.

مساحة إعلانية


⇐ لا تنس عمل مشاركة (Share)

المقالة التالية

رحلة الضوء عبر التاريخ

الأربعاء مايو 26 , 2021
تمت قراءته: 2٬154 يعد الضوء سرًا من أسرار الحياة، وضرورةً من أجل البقاء، فبدون الضوء يموت النبات، وبالتالي يتضور الإنسان والحيوان جوعًا واختناقًا، إذ أن الضوء أساس عملية التمثيل الضوئي (أو ما يُعرَف بالبناء الضوئي) في النبات؛ حيث تتحول أشعة الشمس إلى طاقة كيميائية – مختزنة في صورة سكريات – […]
الزجاجي والمنشور الضوء

اقرأ أيضاً

تعليق واحد على “اﻹيرباج / الوسائد الهوائية وأكثر الأسئلة شيوعًا و”أهمية”!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: رجاء عدم محاولة النسخ، وعمل مشاركة/شير أو استخدم رابط صفحة المقالة كمرجع في موقعك - جميع الحقوق محفوظة لمنصة المقالة