الطريقة الصحيحة لقطر السيارة المعطلة ذات الفتيس الأتوماتيك و نصائح هامة!

المقال ده يهم كل السادة ملاك العربيات اللي فيها الفتيس الأتوماتيك أو الجير الأتوماتيك، علشان تعرف إيه الطريقة الصحيحة اللي تقطر بيها سيارتك في حالة تعطلها لا قدر الله.

في فترة الشتاء في مصر العام قبل الماضي. الدنيا مطرت بشكل غزير جدًا، و فيه عربيات غرقت في جراچات تحت الأرض للأسف. و أخوة كتير مشكورين نصحوا بعدم تشغيل الكونتاكت بتاع العربيات لعدم عمل دايرة قصر (قفلة) Short Circuit لحماية المكونات الكهربية المهمة، و معاهم حق طبعا.

إقرأ أيضاً:  السيارات في الشتاء - إحذر: خطورة المرور بالسيارة عبر المياه العميقة!

في المقال ده حابب أقدم نصيحة بخصوص الفتيس/الجير الأتوماتيك و قطر/جر السيارة، و هي هامة جدًا للحفاظ على فتيس عربيتك، في حالة إن سيارتك تعطلت لا قدر الله و احتجت تسحبها لورشة التصليح.

قطر سيارة متعطلة
Masrawy

الموقف دلوقتي: فيه عربية عطلانة و مش هينفع تشغل الكونتاكت لأي سبب (بصفة عامة بقى) .. و حضرتك محتاج تقطر العربية لأقرب ورشة تصليح.

هنا فيه شوية محاذير بعدها هقول الطرق الصحيحة للقطر، مهم جدا إنك تكون عارفها

محاذير هامة للحفاظ على الفتيس الأتوماتيك

1- أحيانا ناس ممكن مش بتبقى عارفة.. و بتحاول تقطر العربية و هي على P .. ناهيك عن إنه ماينفعش، بس لو فيه محاولة جادة حصلت.. ده ممكن يكسر أجزاء داخلية في الفتيس، ولازم تجيب الفتيس على الوضع N.

2- علشان تجيب الفتيس على N في مواقف الأعطال و الطوارئ.. المصنع بيكون عامل طريقة إنك تفك لوك الفتيس ك Backdoor .. من خلال زرار بيكون مستخبي.. و في الفيديو المرفق طريقة فك اللوك بكل بساطة و يسر.

 

 

3- العربية اللي الفتيس فيها أتوماتيك ماينفعش تتقطر (الأربع عجلات على الأرض) على مسافات كبيرة أو سرعات كبيرة (رغم إن الفتيس على N) و التفسير العلمي لكده.. إن الوضع N بيفصل حركة الموتور عن الفتيس فقط.. لكن مش بيفصل حركة الفتيس عن العجل.. و ده معناه إنك لما بتقطر العربية.. الفتيس بيكون فيه أجزاء شغاله و بتلف من جوه بسبب دوران العجل .. و بما إنك فاصل حركة الموتور فبيكون مفيش تبريد أو تزييت جيد بيحصل (دورة الزيت الطبيعية) .. و النتيجة النهائية إن الفتيس بيحصل فيه إرتفاع هائل في درجة الحرارة Overheating و بيؤدي لتدمير الفتيس في النهاية.

إقرأ أيضاً:  حرارة المحرك - 4 نصائح هامة عند إرتفاع درجة حرارة المحرك بسيارتك!

4- في كتالوج سيارتك لازم تلاقي المصنع قايل معلومتين مهم جدًا (جدًا) انك تعرفهم (أقصى مسافة قطر [س] .. أقصى سرعة قطر [ص]) .. ولو اضطريت لازم بكل الأحوال ما تتخطاش الرقمين دول حفاظا على فتيس سيارتك.

5- للناس اللي بتكسل تقرأ الكتالوج، عادة متوسط أقصى مسافة قطر (25 كم) على سرعة ماتتخطاش (40 كم/ساعة)
حد يسألني.. طب الورشة أبعد من كده.. أعمل إيه؟

هنا أقولك الطرق الصحيحة و القياسية Standard للقطر/الجر

1- العربية لو جر أمامي.. يبقى ارفعها كلها على ونش أو ارفع العجلتين اللي قدام بس و نزل الهاند بريك و اقطرها أي مسافة انت عايزها ( لأن الفتيس متوصل بالعجل اللي قدام فقط).

2- العربية لو دفع خلفي.. يبقى هتعمل العكس.. ترفع العجلتين الخلفيتين.. و اعمل لوك للدركسيون (علشان العجل ما يلفش يمين او شمال) .. لو مش متاح ونش ساعتها هتكون مضطر تفك عمود الكردان (ده لو عندك الإمكانية) علشان تفصل الفتيس عن حركة العجل و جرها على الاربع عجلات عادي.

3- لو العربية دفع كلي أو AWD (السيارات الدفع الرباعي 4×4 كده برضه) يبقى لازم كلها تترفع على ونش..أو ترفع العجلتين اللي قدام و العجلتين الخلفيتين بيتحطوا على Dolly (زي الصورة) بحيث عجل الدوللي اللي بيلف و العجلتين الخلفيتين ثابتين. أو تترفع على ونش أو تتقطر بس في حدود المسافة و السرعة اللي قالهم المصنع في الكتالوج. (زي ما ذكرت في نقطة رقم 4 فوق)

جر السيارة ذات الفتيس الأتوماتيك
Towing worldwide

طبعا اللي عربيته فتيسها مانيوال.. أمه دعياله لأنه مش محتاج أكتر من إنه يمور الفتيس (الوضع N) و يقطرها أي مسافة هو عايزها على أي سرعة (بس طبعا في حدود الأمان له و للي حواليه).

إقرأ أيضاً:  تيل الفرامل / الفحمات / Braking pads - علامات وجوب التغيير (هام جدًا)

ياريت اللي استفاد من المعلومة يعمل شير للتوعية علشان غيره يستفيد و ماتكسلش من فضلك (معلومة صغيرة زي دي ممكن تساوي وقت و مجهود و فلوس في إحدى المواقف الصعبة لغيرك).


أتمنى لكم السلامة على الطريق.
لا تنسى عمل مشاركة/شير لنشر المعلومة، ولايك لصفحتنا على فيسبوك #عن_السيارات.
ورجاء الدعاء لوالدتي ووالدي بالرحمة والمغفرة وأن يجعل العمل في ميزان حسناتهم.

أطيب التحايا،
#أبوجادالله_يكتب
#عن_السيارات


لمتابعة نشر المقالات القادمة لي، قم بالإشتراك في النشرة البريدية الأسبوعية لمنصة المقالة من خلال النموذج بالأسفل و بضغطة واحدة:



الكاتب مسئول عن كتاباته على منصة المقالة.

مساحة إعلانية


⇐ لا تنس عمل مشاركة (Share)

المقالة التالية

القيادة في الشبورة - قاعدة الثلاث ثوان و نصائح هامة

الأثنين مارس 22 , 2021
تمت قراءته: 12٬730 بخصوص القيادة في الشبورة، بعض القراء تداولوا بعض تعليمات الأمان على صفحة #عن_السيارات على فيسبوك، وكان أحسنها إنك تخلي دليل ثابت قدامك.. و عموماً لو مش مضطر في اليوم ده بلاش تسوق في الشبورة أفضل. طريقة تقدير المسافة الآمنة عند القيادة في الشبورة إزاي أأقدر المسافة المناسبة […]
القيادة في الشبورة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: رجاء عدم محاولة النسخ، وعمل مشاركة/شير أو استخدم رابط صفحة المقالة كمرجع في موقعك - جميع الحقوق محفوظة لمنصة المقالة