معلومة ناس كتير بتغفل عنها أثناء شراء الكاوتش و لكنها مهمة جداً لأنها أودت بحياة ناس قبل كده للأسف! فيه حروف و أرقام كتير على جانب الكاوتش. أغلب الناس بتهتم فقط بمقاسات الكاوتش نفسه و تاريخ الصنع و تسيب الباقي، ومنهم على سبيل المثال كود سرعة الكاوتش / الإطار.
ما هو كود السرعة الخاص بالكاوتش / الإطار
كود السرعة هو حرف بيدل على أقصى سرعة تقدر تمشي بيها على الكاوتش ده بدون حدوث انهيار في بنية الكاوتش لا قدر الله. و مكانه زي الصورة كده
معنى كود السرعة
ودي قائمة بالحروف و أقصى سرعة مسموحة:
L 120 km/h
M 130 km/h
N 140 km/h
P 150 km/h
Q 160 km/h
R 170 km/h
S 180 km/h
T 190 km/h
U 200 km/h
H 210 km/h
V 240 km/h
W 270 km/h
Y 300 km/h
توصية عند شرائك كاوتش جديد
بالنسبة للسيارات SUV و النقل الخفيف (ربع نقل) لو السير على طرق غير ممهدة “فقط” الأفضل L لو هتجري يبقى هات S أو T
بخصوص السيارات السيدان (الملاكي) و الميني فان الأفضل S أو T.
بالنسبة للسيارات الرياضية و هواة السرعة المفرطة فالأفضل و الأأمن H أو V أو ممكن تزود الدرجة لو هتجري أكتر من كده.
تختار أعلى درجة أنسب؟!
فيه حد ممكن يقولي طب ما نجيب أعلى حاجة و خلاص و نشتري دماغنا؟!
أقوله كل ما جبت درجة أعلى, كل ما كان سعر الكاوتش أغلى, و بالتالي ممكن تدفع فلوس في حاجة ما تستخدمهاش.
و ممكن تدفع فلوس أقل في كاوتش بدرجة أقل و انت من هواة الجرى و يحصل ما لايحمد عقباه.. فالأفضل في كل الحالات انك تختار المناسب لك.
علاقة السرعة بضغط الهواء بداخل الكاوتش / الإطار
مهم كمان انك تعرف ان كل ما زودت سرعتك كل ما الضغط بداخل الإطار بيزيد, فلو هتطلع على طريق سريع (مسموح عليه بالسرعات العالية مثلا) و ناوي تجري مثلاً على 160 كم/ساعة لازم تكون متأكد ان الكاوتش على الأقل درجته تكون Q بس الأفضل انك تعلى درجة دايماً و ماتمشيش على آخر المسموح به زي مثلاً R.
و لازم تكون مراجع على ضغط الهواء في الكاوتش لأن الحرارة بعد مشوار طويل بتخلي الهواء يتمدد و الضغط يزيد – خاصة في الأجواء الحارة – ده غير زيادة الضغط كل ما تزود سرعتك و اللي أقرتها المنظمة الأوربية الفنية المختصة بالإطارات و اسمها ETRTO أو The European Tyre and Rim Technical Organization على هيئة معادلة بتقول : كل زيادة 10 كم/ساعة في السرعة = 1.5 PSI زيادة في الضغط.
و قريب قريت عن حادث سيارة بها عريس و عروسة الإطار انفجر على سرعة عالية نتيجة ان الإطار كان ضغطه زيادة قبل التحرك و بالتالي مع الطريق و السرعة العالية الضغط زاد لدرجة الإنهيار فجأة و بالتالي النتيجة معروفة للأسف.
فمهم انك و انت بتشتري الكاوتش تاخد بالك من الحرف اللي عليه وانه مناسب لك, و انك تتأكد من ضبط ضغط الهواء مرة اسبوعياً أو كل أسبوعين للحفاظ على سلامتك و سلامة أسرتك.
أتمنى لكم السلامة على الطريق.
لا تنسى عمل مشاركة/شير لنشر المعلومة، ولايك لصفحتنا على فيسبوك #عن_السيارات.
ورجاء الدعاء لوالدتي ووالدي بالرحمة والمغفرة وأن يجعل العمل في ميزان حسناتهم.
أطيب التحايا،
#أبوجادالله_يكتب
#عن_السيارات
لمتابعة نشر المقالات القادمة لي، قم بالإشتراك في النشرة البريدية الأسبوعية لمنصة المقالة من خلال النموذج بالأسفل و بضغطة واحدة:
الكاتب مسئول عن كتاباته على منصة المقالة.
مساحة إعلانية
مهندس و كاتب و مصور فوتوغرافي من مصر، يعمل في مجال صناعة السيارات منذ عقد من الزمان، حاصل على العديد من الجوائز.
