في مقالة النهاردة هنتعرض لموضوع هام للغاية ويساوي حياة إنسان، واﻹهمال فيه قد يؤدي لحوادث لا قدر الله. حوالي 35%+ من الحوادث، و 20% من وفيات حوادث السيارات بيكون السبب فيها اﻹطارات! [1]طبقًا لإحصائيات الإدارة الوطنية للسلامة على الطرقات السريعة في أمريكا NHTSA. علشان كده هنتكلم عن ميعاد تغيير الإطارات ونفند معلومات خاطئة وأساطير شائعة متداولة على منصات التواصل الإجتماعي.
هل ميعاد تغيير الإطارات ثابت؟ بمعنى آخر معدل إستهلاك ثابت؟
فيه معلومات حاليًا بقت شائعة زي متوسط عدد الكيلو متر اللي المفترض الكاوتش يمشيه (من 40 إلى 50 ألف كيلو متر في المتوسط)..و تاريخ اﻹنتاج و إزاي تعرف تقراه من على الكاوتش و تحسبه.
بس هنا لازم أطرح سؤال مهم جدا ، و هو: بناء على إيه بيتم تغيير الكاوتش؟
اﻹجابة هنا 3 نقاط..
1- بيتم التغيير في حالة اﻹستهلاك الطبيعي
ناس كتير هتجاوبني بعد 40-50 ألف كيلو متر زي ما كتبت فوق. بس هل ده لازم؟!
مش لازم طبعا.. لأن حسب طريقة اﻹنطلاق الناعمة بالسيارة والسير بها على طرق ممهدة ده بيحافظ على الكاوتش وممكن يعيش أكتر من كده.
وللعلم إن السير المسرع بالسيارة فوق طريق فيه حصى (ظلط) كفيل بإنقاص العمر اﻹفتراضي للكاوتش للنصف.
طب أعرف منين إن ميعاد تغيير الإطارات جه بسبب إستهلاكه؟
هقولك بطريقة سهلة جدا وتقدر تعملها بنفسك .. صناع اﻹطارات بيعملوا علامات في أماكن محددة في الكاوتش (زي اللي مشاور عليها الدوائر الصفراء في الصورة اللي فوق). لما سطح الكاوتش (المداس) يوصل لها بسبب اﻹستهلاك و يبقوا بنفس المحاذاة ساعتها وجب التغيير. فيه ناس ممكن تغير بعد 100 ألف كيلو متر (حسب المعايير اللي قولتها سابقا).
فبكل بساطة تقدر تفحص الكاوتش بنفسك و تقدر تقول هغير ولا لأ بناء على العلامات اللي حطها صانع اﻹطارات نفسه حسب إستهلاكك مش بناءًا على كيلو متر معين (و دي كانت أسطورة شائعة للأسف).
2- بيتم التغيير بناء على حساب عامل الزمن
و دي نقطة للأسف ناس كتير بتغفلها و بتركز بس في النقطة الأولى.
“يعني أنا ممكن يكون الكيلومتر بتاعي قليل و بركن العربية أو برفعها مدد طويلة.. و بعدها أغير الكاوتش و هو بحالته؟؟!! طب إزاي الكلام ده؟!”
هقولك لأن الكاوتش أساس المادة اللي متصنع منها و هي المطاط و المادة دي نتيجة عوامل كتير زي الحرارة والضغط والزمن، بتفقد خواصها و بتبتدي تتحلل و بعدها تشقق.
علشان كده نصيحة هامة جدا إنك تركز قوي في تاريخ إنتاج الكاوتش إنه يكون قريب وانت بتشتري.
طيب إمتى بينتهي تاريخ صلاحية الكاوتش؟
هنا بقى تضاربت الأقوال.. ناس تقول بعد 3 سنين، وناس تقول بعد 4 أو 5.. بس الصحيح إن صلاحية الكاوتش ممتدة ل 6 سنوات (حسب جماعة سلامة اﻹطارات الأمريكية TSG) و ممكن تقل حسب طريقة اﻹستخدام (زي ما وضحت في النقطة السابقة).
يعني لو جيت تشتري كاوتش جديد ولقيت انه انتاجه عدى عليه 3 سنين .. فاعرف انه معاك 3 سنين فأقل تاني فقط ولازم تغير.. فبلاش منه.
ولو رفعت العربية كذا سنة لازم تبقى عارف انك لازم تغير الكاوتش حتى لو استخدامه قليل (و معاه السيور لأنها متصنعة من المطاط و نفس المبدأ ينطبق عليها و كل القطع الكاوتش في السيارة).
ملحوظة هامة: الفترة دي شايف تجارة بدأت تنتشر على إستحياء و هي تجارة الكاوتش المستعمل وارد الخارج لغلاء الأسعار.. و رأيي في الموضوع إن بمعلومية تاريخ اﻹنتاج و معرفة متبقى كام سنة على إنتهاء الصلاحية + فحص الكاوتش و رؤية العلامات اللي ذكرتها سابقا .. ساعتها إنت تقدر تقرر تشتريه ولا لأ.
3- بيتم التغيير بالطبع عند التعرض لجسم حاد
وقتها الجسم الحاد بيقطع في جسم الكاوتش أو يوصل للسلك (اللي هو العمود الفقري بتاع الكاوتش)، و الحاجات دي ما ينفعش السكات عليها أو ترقيعها لأن اﻹطار ممكن ينهار في لحظة لاقدر الله ويتسبب في إصابات أو وفاة.
أتمنى لكم السلامة على الطريق.
لا تنسى عمل مشاركة/شير لنشر المعلومة، ولايك لصفحتنا على فيسبوك #عن_السيارات.
ورجاء الدعاء لوالدتي ووالدي بالرحمة والمغفرة وأن يجعل العمل في ميزان حسناتهم.
أطيب التحايا،
#أبوجادالله_يكتب
#عن_السيارات
لمتابعة نشر المقالات القادمة لي، قم بالإشتراك في النشرة البريدية الأسبوعية لمنصة المقالة من خلال النموذج بالأسفل و بضغطة واحدة:
الكاتب مسئول عن كتاباته على منصة المقالة.
مساحة إعلانية
مهندس و كاتب و مصور فوتوغرافي من مصر، يعمل في مجال صناعة السيارات منذ عقد من الزمان، حاصل على العديد من الجوائز.
الملاحظات أو المصادر
