من المهم جداً عند إرتفاع درجة حرارة المحرك بسيارتك. أو بمعنى آخر إنك أول لما تلاقي مؤشر الحرارة عندك إبتدا يزيد عن النص أو لمبة الحرارة نورت (ده بالنسبة للموديلات الجديدة اللي مفيهاش مؤشر حرارة المحرك) لازم تقف و ما تكملش بالعربية و تعرف سبب زيادة الحرارة ده إيه.
لو انت بعيد عن متخصص بتقدر تعمل مراجعة ظاهرية, و تقدر تعمل الخطوات دي بنفسك:
-
مستوى مياه التبريد (إحذر حرارة المحرك قد تؤذيك!)
بتبص على مستوى مياه التبريد -على قربة المياه- من بره (إوعى تفتح غطا القربة او الرادياتير في حالة السخونة تجنباً للإصابة بالحروق جراء بخار المياه المندفع).
-
مراجعة أي تسريب
بتبص على تسريب مياه على الأرض أو من أي جزء من دورة التبريد (أحياناً خرطوم نشف فشقق و بيضرب.. كوليه/قفيز خرطوم hose clamp مكانش محكم كويس.. الرادياتير اتخرم بسبب زلطة من الطريق..الخ).
-
في حالة وجود تسريب كبير
لو فيه تسريب كبير ما تشغلش الموتور تاني و ابعت العربية أأمن لأقرب مكان متخصص يعالج سبب زيادة الحرارة و يعمل إصلاح في الأجزاء اللي تضررت.
-
في حالة لو مفيش تسريب ظاهر و حرارة المحرك عالية
لو مفيش تسريب و المياه كانت ناقصة .. استنى لما الموتور يبرد و زود مياه تبريد بعد ما تشغل الموتور (لازم يكون معاك زجاجة او جيركن فيهم مياه تبريد احتياطي بصورة مستمرة).
و سوق لأقرب مكان متخصص (وعينك على مؤشر أو لمبة الحرارة) علشان تكشف على العربية و تعرف مصدر السخونية اللي حصلت ايه و ما تعديش الموقف كده.
موضوع إرتفاع الحرارة ده عادة بتكون عواقبه وخيمة.. صديق لي قريب حصل عنده ارتفاع في الحرارة مفاجئ و زود مياه تبريد و نتيجة انشغاله ما راحش كشف على عربيته و حصل قطع بسيط جدا في جوان وش السليندر نتيجة ضغط بخار المياه اللي بيكون عالي جدا.. و ده أدى لتسريب مياه التبريد للغرفة رقم 3 (الصورة المرفقة), و اضطر يعمل عمرة للموتور.
أتمنى لكم السلامة على الطريق.
لا تنسى عمل مشاركة/شير لنشر المعلومة، ولايك لصفحتنا على فيسبوك #عن_السيارات.
ورجاء الدعاء لوالدتي ووالدي بالرحمة والمغفرة وأن يجعل العمل في ميزان حسناتهم.
أطيب التحايا،
#أبوجادالله_يكتب
#عن_السيارات
لمتابعة نشر المقالات القادمة لي، قم بالإشتراك في النشرة البريدية الأسبوعية لمنصة المقالة من خلال النموذج بالأسفل و بضغطة واحدة:
الكاتب مسئول عن كتاباته على منصة المقالة.
مساحة إعلانية
مهندس و كاتب و مصور فوتوغرافي من مصر، يعمل في مجال صناعة السيارات منذ عقد من الزمان، حاصل على العديد من الجوائز.
