البحث عن السلام في اليابان! – الوجهة أم الرحلة؟

لكل صورة التقطها قصة.. بعضها مضحك و بعضها مفزع لاقتراب حياتي فيه من حافة الخطر، و بعضها مقبض و بعضها شجي، و بعضها يفيض بالتفاؤل.. و منها: البحث عن السلام، و كانت رحلة غير متوقعة.

خريطة اليابان
VectorStock

البحث عن السلام في اليابان!

قبل ما اروح اليابان لأول مرة و كانت في 2012 بصيت ع الخريطة و كان ف خيالي تصور كده اني أصور جبل فوجي -بركان ضخم خامل و شهير هناك- كخلفية صورة لمياه بحيرة.

لقيت إن فيه حوالي 5 بحيرات -على ما اتذكر- و بعد شوية دراسة و بحث لقيت ان بحيرة “آشينوكو ليك” Ashinoko Lake هي الأفضل..

و لما روحت اليابان كنت مستني أول يوم اجازة بفارغ الصبر.. و كان معانا ف الجروب جنسيات كتير.. اشي سوداني و تركي على بيرو و هندي و باكستاني و ميكسيكي و تايلاندي و اندونيسي..

فالمهم ليلة اليوم الاجازة ده قاعدين بنتعشى سوا و الناس بتسأل بعضها خطتها ايه لليوم التاني.. فيه ناس قالت هتروح طوكيو – بحكم انها كانت قريبة من يوكوهاما – و فيه ناس قالت انها هتروح يوكوهاما مارينا أو سي بارادايس و دي كلها حتت قريبة..

الخطة!

لما سألوني رحت مطلع خريطة من جيبي و راسم عليها مسار – مشهد زي فيلم الطريق الى ايلات كده! -. قلت لهم هركب القطر الفلاني، و بعديه في محطه اسمها اوفونا هركب قطر تاني. و انزل اركب اتوبيس و اروح مدينة اسمها كاماكورا. و دي اللي فيها بوذا هناك هاخد شوية صور و الف شوية ف المعبد و بعدها هرجع تاني في اتوبيس لغاية محطة القطر..

المفترض اركب خط كذا و ف اخر الخط هنزل اركب قطر كذا.. كنت فاكر حوالي بتاع 4 ل 5 قطارات.. و بعدها هركب قطر بيصعد على الجبل – ارتفاع 777 متر فوق سطح المياه – و بعدها انزل اخر الخط اخد cable car أرضية بتطلع لقمة الجبل بزاوية انحدار شديدة.. بعدها هركب cable car هوائية “تيليفريك” هقدر منها اخد شوية شوتات لجبال هاكونيه..

بعدها هركب cable car تانية بس المرة دي بتنزل تدريجيا للناحية التانية من الجبل .. هنا بقى اكون وصلت بحيرة آشي .. هركب مركب ياخدها كروز للضفة التانية في حوالي 20 دقيقة.. هاكون وصلت لمكان التصوير بالحسبة بتاعتي قبل وقت الغروب بحوالي 15 دقيقة .. فهقدر اصور جبل فوجي في خلفية البحيرة وقت الغروب…!

الناس انبهرت – بس نوعية الانبهار اللي هو ايه اللي الجدع المجنون ده قاله؟! – الراجل الكووردينيتور الياباني بتاعنا اتخض جدا.. و قالي صعب تعمل كل ده ف يوم واحد، و بعدين كل ما تبعد عن المدينة و تتجه للريف مش هتلاقي حد بيتكلم انجليزي؛ و لو تهت مش هتعرف ترجع. انا بنصحك تكتفي بكاماكورا بس. قلت له هفكر..

الرحلة!

بتوفيق من ربنا عملت الطلعة دي.. و تهت كذا مرة طبعا! – بس كنت بتعامل بال body language – اللي شاف فيلم The Secret Life Of Walter Mitty هيفهم قصدي.

و طبيعي يحصل حيود للخطة نتيجة عوامل خارجية.. زي ان يومها لما وصلت اخر محطة للكيبل كار عند البحيرة بسأل موظفة الاستعلامات شوية اسئلة و من ضمن الدردشة كلمتها عن جبل فوجي.. قالتلي انهاردة الغيوم كثيفة جدا و بتحجب الجبل تماما.. و لفت الشاشة اللي قدامها وريتني الحالة من خلال كاميرات حاطينها قدام الجبل.. اصبت شوية بخيبة امل.. بس قلت مش مهم..

أنا كان تارجت ليا إني اوصل لنقطة معينة و خلال الرحلة على مدار اليوم شفت حاجات كتير و اتعلمت حاجات جديدة و صورت صور كتير..

لقيت ان العبرة كانت من خلال الرحلة نفسها فابتسمت و شكرت الموظفة و نزلت من المحطة و قبل ما اركب المركب اتمشيت شوية على ضفة البحيرة لغاية نقطة معينة و خدت اللقطة دي.. و سميتها “البحث عن السلام”.

البحث عن السلام
AboGadAllah Photography

الصورة اعداداتها كانت:

f/5.6 – ISO400 – SS:1/160 – FL:55mm

 

إقرأ أيضاً:  العلامة التجارية - أهم 22 قانونًا لتمييز علامتك التجارية - Branding


لو عاوز تشوف صور أكتر ليا، ده لينك صفحتي على فيسبوك.

أطيب التحايا،
محمد أبوجادالله
#أبوجادالله_يكتب


لا تنس أن تشترك في النشرة البريدية الأسبوعية لمنصة المقالة ليصلك جديدنا على بريدك الإلكتروني كل يوم جمعة، وذلك من خلال النموذج أدناه و بنقرة واحدة:



الكاتب مسئول عن كتاباته على منصة المقالة.

مساحة إعلانية

⇐ لا تنس عمل مشاركة (Share)

المقالة التالية

غسيل شاسيه السيارة و تشحيمه - ما هي الطريقة الصحيحة و الأخطاء الشائعة؟

السبت مارس 27 , 2021
تمت قراءته: 2٬049 فيه موضوع مهم كتير مننا إما بيغفل عنه للأسف أو بيكسل يعمله، و لقيت إن مهم إني أتكلم عنه و هو “غسيل شاسيه السيارة”. غالباً ملاك السيارات بيهتموا بغسيل السيارة من الخارج على فترات دورية منتظمة، و نسبة أقل شوية بتهتم بغسيل السيارة من الداخل كمان على […]
غسيل شاسيه السيارة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: رجاء عدم محاولة النسخ، وعمل مشاركة/شير أو استخدم رابط صفحة المقالة كمرجع في موقعك - جميع الحقوق محفوظة لمنصة المقالة